Corpus Van Reenen-Mulder (CRM14): Oorkonde P051p37201

Allen den ghene_ di desen brief solen sien en_ horen lesen vrindelike gruete voerghesant met kennisse der waerheit solen weten dat wi johan clocludere . heinric kelberch . kerstiaen va_ de_ bosghe . kerstiaen va_ laren . Matheeus huvenere . willem op ghene heyde . ende johan coex . schepene_ va_ lu_mene va_ buten doen cont en_ tughe_ / Dat voer ons en_ Johan_e va_ ha_me richt_e ons heren h_en Everaerts va_ der Marke_ tsh_en va_ lu_mene / Comen es katherina sroeden wettich wijf was heinrics colen va_ schoela en_ heeft betoent Met goeder leve_der waerheit also alsijt sculdich was te betonen / Dat heinric haer Man / met sinen anderen testame_te Maecde katherine_ sine_ wive voerghe_ twee stucken erfs haren vryen wille daer mede te doene / en_ / die te v_copen en_ haer daer mede te behelpen tot der scout behoef di si sculdech waren en_ onder hun beyden ghemaect hadden / Nae den welke_ betoenisse / katherina voerghe_ es ghegoet in dese twee stucke_ erfs en_ sijn gheleghe_ te scoela / Dat een stucke es ene sille bams luttel min och luttel Meer en_ es gheheite_ dat willems broec en_ gheleghe_ bi erve godevaerts va_ wymeri_ghe_ op di ene side / en_ bi erve beateren colen op di ander side / Dat ander stucke es onder + halve sille wenachtichs lans luttel Min och luttel Meer gheheiten tfeld_endeyke en_ es gheleghe_ neven di strate daer Men te johan joes wert gheet bi erve johan coex op di ene side en_ bi heinric colen gheleghe was op di and_ side / Daer na es dese voerghe_ katherina come_ voer richt_e en_ schepene_ voerghe_ / jn hare_ p_pere_ p_sone en_ Met / hare_ eyghene_ wille / en_ heeft bekent en_ gheliet dat si heeft v_cocht twee guldene / dat es te verstane enen oude_ scilt goet va_ goude en_ swaer va_ ghewichte ochte di werde daer af ghereke_t voer sestene groete en_ ene_ gulde_ voer twelve groete / jaerlijcs te vergheldene te sinte johans messe baptisten erflec en_ ewelec joffrouwen yden va_ jndhove_ nonne te herke_rode ocht bringher dis briefs va_ rechte te hebbene / welke voerghe_ twee guldene / dese voerghe_ joffrouwe yda becreghe_ heeft Met ene_ wetteghen coepe jeghe_ katherine_ voerghe_ / voer di welke twee guldene voerghe_ / dese voerghe_ katherina heeft deser voerghe_ joff_ yden te ond_pa_de ghesat dese voerghe_ twe stucke_ erfs Met manisse en_ Met vo_nisse en_ Met hare_ gheleverde_ Mombore nae sine volghebode also dat kerstiaen Minbier in dese voerghe_ ond_pa_de es ghegoet en_ gheerft tot deser voerghe_ joff_ behoef als een ghichtdragher nae maenisse des scouteyten en_ von_isse d_ schepene_ voerghe_ / en_ Met alle_ de_ rechte daer toe come_ dat in deser sake_ sculdich es te gheschiene en_ gheen poent va_ rechte in deser sake_ acht_~ghelate_ noch v_ghete_ Met alsulker voerwaerde_ / waert dat sake dat deser voerghe_ joff_ ocht bringher dis briefs va_ rechte niet gnoech ghedaen en woerde altoes ten voerghe_ tyde va_ desen voerghe_ ceyse / so mach come_ dese voerghe_ joff_ ocht bringher dis briefs va_ rechte Met de_ ghichtdragher en_ slaen haer hant also alst gewoenlec es in di banc te lu_mene tote dese_ voerghe_ ond_pa_de_ als tote hare_ wettighe_ erve / en_ dese voerghe_ joff_ yda en_ kerstiaen haer voerghe_ ghichtdragher hebbe_ ghewilcoert en_ gheloeft voer richt_ en_ schepene_ voerghe_ va_ dese_ voerghe_ erve bede en_ heren ceys daer af te gheldene ghelijc den and_en reenghenoeten als dit voerghe_ erve voer dese_ voerghe_ ceys bleve / voert so heeft katherina voerghe_ deser voerghe_ joff_ gheloeft allen de_ co_mer af te doene di Men aen dit voerghe_ erve vinden Mochte vte~ghenome_ bede en_ derden + halve_ pinninc h_en ceys / En_ alle deser vorwaerde_ begherde dese voerghe_ joff_ te hebben enen schepene_ brief en_ katherina voerghe_ wilcordene / Ende o_me begheren en_ wilcoren beyde der partyen voerghe_ / En_ oech dat wi schepene_ voerghe_ willen dat alle dese voerwaerde_ vast en_ ghestadech bliven / so heb wi schepene_ voerghe_ jn enen ghetughenisse en_ jn orcunde der waerheit alle der dinghe_ di hier boven ghescreve_ sijn onsen ghemeynen syghel aen desen jeghewordighen brief ghehanghen / Ghegheve_ jn de_ jare nae der gheboerden ons heren doen Men screef dusent drie + hondert ende twee + en + tseventich des sesdes daechs in aengaende der Maent di gheheiten es Russelmaent ochte braemaent