Corpus Van Reenen-Mulder (CRM14): Oorkonde P057p35201

Wij zuster beatris van lobosch / abdisse des scloesters van herkenrode / va_ der Ordenen va_ Cystias gheleghen jnt besdom van ludeke Ende alle tcovint des voerghenaems cloesters / Doen cont / en_ te wetene allen den ghenen die desen openen brief soelen sien / en_ horen lesen / Dat wilen hir te~voren vrouwe Ermtruyt vrouwe va_ lobosch gaf jn purre armusen / en_ besetde binnen hore_ levende live Doen sijs wale meghtech was / met consente heren stas van den bogharde haers wettechs mans vieftien pont swarter tornose erfliker / Rinten tot enen autare te funderene / en_ te stichtene jnt cloester va_ herkenrode voregh_ / van welken autare voregh_ / die Collatie en_ ghichte / es ons toe~behorende jaerlike te heffene en_ te hebbene / ane en_ op goede en_ sekere onderpande alse ane de goede va_ + der heyden gheleghen tusschen aerscout en_ rillaer / die mer seet de hoebeymde liefkensberch / en_ den nysberch / en_ ane alle de goede soe waer dat si gheleghen sijn ghelikerwijs alse testament spriect / dat die voergh_ ver ermtruyt maecde / en_ ordineerde met c_sente haers mans voergh_ / jn wellike onderpande en_ ghoede voergh_ / her jan van Curinghen ons Capellaen es in vaster possessien en_ ghegoet / vore hof en_ vore here / jn zaken en_ in orber des autaers voergh_ alse voer hof goeswijns va_ + der Riest wonende te rillaer / Maere om_e meerre orber en_ profijt des autaers voregh_ En_ der gheynre dien va_ jare te jaere belesen en_ verdinen moghen Ende om_e die rinten des autaers voergh_ onsen cloestere voregh_ naerre te belegghene en_ te copene soe hebbe wi gheconsenteyrt en_ ghedaen eyn wisselinghe va_ + den . xv . ponden swart_ torn_ des voregh_ autaers met bruder janne den prioer va_ sent jans te zelim bi dyste va_ der ordenen der sartrosen en_ met c_sente alle sijns covins / om_e ene seker sum_e va_ ghelde Dats te wetene om . twe hondert reale en_ tiene / goet en_ payabel of die w_de daer af in andere_ paymente jn deser c_ditien en_ maniren / dat mer dese voregh_ sum_e va_ ghelde sal legghen en_ bekeren ane goede seker rinten die naerre gheleghen sijn onsen Cloest_e voregh_ en_ och profiteliker den voergh_ autare jn welken autare wij die ghichte willen behoude_ gheliker~wijs dat te~voren gheordineirt was En_ hir om_e soe schelde wi quite mit c_sente en_ wille ons ghemeins covins / clerlike en_ te~male die voregh_ . xv . pont swarte erfliker rinten des voregh_ autaers En_ gheven over alle dat recht dat wi ocht onse ghemein covint ane die xv . pont swarte erfliker rinten des voregh_ autaers hebben ocht hebben mochten En_ gheven se over / den voregh_ priore / en_ sinen Covinte erflike en_ om_erme / horen wille / en_ hore_ orber mede te doene / en_ gheloven hoen dat wij beat_s voregh_ abdisse noch ons covint voregh_ noch yman va_ onsen weghen jeghen dese voreghemaecde ordinancie en_ voerwerde / en soelen doen noch attempt_en te doene / en_ om_e~dat wij beatris voregh_ abdisse / en_ onse ghemeyne Covint begheren / en_ willen dat dese voreghescreven wisselinghe vaste en_ ghestedech blive / en_ va_ punte te punte wale ghehauden werde soe hebbe wij zuster beatris voregh_ abdisse / onsen p_peren sighel met + den ghemeynen sighele ons ghemeins Covints voregh_ ane dese_ opene_ brief ghehanghen en_ desen brief daer mede bezeghelt jn orconscap en_ ghetughenisse der waerheit alle der dinghen die hir boven bescreven sijn / Dits gheschiet in jaer van ons heren gheboerden / Doe mer screef / M˚ . + CCC˚ / + li&jring; / des . tiende dachs binnen sporkille~maende