Corpus Van Reenen-Mulder (CRM14): Oorkonde P065p31201

Alle den + ghenen die dese lettren zelen sien ochte horen lesen / Gisebrecht ? Ende gheerem vten nuwen~huys scepenen van brussele salut ende kennisse der waerheit / wij doen cont dat vore ons sin comen . arnout de Coninc godeuert va_ Mons . jacob van Mons sin kinder . her willem de coninc . segh_e die m_ heet soy Ende gheerem sine_ brud_e . arnout delen sone wilen was heinrex leuws / . wout_e Ende arnout ghebrud_e sonen wilen waren wouters leuws also maghe . jans van + der porten wilen was van sire Moeder weghen / die~welke vervinghen alle hare partie die daer niet en was / jn deen side Ende ghisebrecht lenken . henrec ? . willem sin bruder . jan van + der sennen die men heet hasen~oghe . heinrec vroude arnout sin bruder ende jan lymeer alse maghe jans van + der porten vorghenomt van sins vader weghen die oec vervinghen alle hare partie die daer niet en was in dander side / Ende heeft deene partie dandre quite ghescouden gheliic dat hir + na bescreuen es . Dat es te + uerstane dat de + vorghenomde Maghe van + der Moeder weghen . hebben quite ghescouden de + vorghenomde Maghe vans Vader weghen . van alle den Rechte dat sij hadden in een huys . Ende jn + de hofstad daer wilen jan van + der porten vorghenomt jn woende gheleghen tusschen willem tays ende hughes van Coudenberghe die wilen was / Ende oec van allen den Rechte dat sij hadden jn drie dachwant lans die te + laken gheleghen sin / Ende van alle diere erfelecheit die des vader Maghe houdende sin van jans weghen van + der porten vorghenomt Ende oec van alle dien dat der Moeder Maghe eisschende waren des vader Maghen tote opten dach dat dese lettren ghemaect waren / Ende behoudenlike dien / Dat des vader maghe vorghenomt zelen besetten . viif pont tsiars erfelike der Capittelen van sente goedelen ter Campelrien behoef ; Vort es te + wetenne dat de + vorghenomde Maghe van des vader weghen hebben quite ghescouden de + vorghenomde Maghe van + der Moeder weghen / van alle den Rechte dat sij hadden jn een huys Metten gronde gheleghen bij sente godelen Dat wilen was s_ arnouts dien men hiet lombart : wilen Tresorier in + de kerke van sente godelen . Ende van alle der erfelecheit die der Moeder Maghe jans van der porten vorghenomt van jans weghen houdende sin / . Ende van alle dien dat sij hen noit eisschende ware tote opten dach dat dese lettren ghemaect waren Ende behoudenleke oec dien . dat der Moeder Maghe vorghenomt zelen besetten Tien pont tsiars erfelike der Capitelen van sente godelen t_ Campelrien behoef die vorghenomt es / Ende hir + mede sin de + vorghenomde Maghe van + der Moeder weghen alle jn deen side / Ende de Maghe van des vader weghen jans van + der porten vorghenomt alle jn dander side besceden / ghesaet . Ende gheaccordeert van desen goede vorghenomt Ende van alle den tviste / onbescedenheiden / ende (-) die tusschen hen gheweest heeft van + den tide die leden es tote opten dach van heden / Ende heeft deen opten andren verworpen en_ verteghen na Recht ende vsage_ van + der stad van brussele / Behouden dien / waer dat sake dat enech goet hirvordane van + den worde daer men tevoren niet aue en wiste / dat men dat deilen zoude ghelijc dat + m_t sculdech ware te + deilne na + der stad Recht van brussele , jn + de~welke orkenscap wij de + vorghenomde scepenen bij beden van + den partien onse zeghele an dede lettren hebben ghehanghen / Dat was ghedaen jn + den jaren ons h_en doe men screef . Dusentech drie hondert en_ tvaleue des zaterdaghes na Chinxe_dach - - - - -