Corpus Van Reenen-Mulder (CRM14): Oorkonde P065p31401

Cont Si allen dat lisebet van stercbeke / heeft ghegheuen binnen haren Ghesonden liue en_ bewijst met wetteleker vertienessen haren dochteren dats te verstane lisbetten / en_ woutere_ godeu_t sone was van orssendale haren man en_ haren mombore / en_ agneesen en_ lodewike coevoet haren man en_ Mombore de woninghe also alsi gheleghen es an + de waermoesporte metten husen / en_ met al dat daer toe behort / De~welke woninghe de vorgheseide ghesustere met haren Mannen en_ Momboren vorghenoemt / wettelec en_ met eendrechtecheiden ghedeilt hebben Met Meeringhen / ghelijc datter ghemeert en_ ghepaelt es na der stat zede van brussele / jn + der Manieren die hier naer bescreuen staet : Dat es te verstaene / dat de helft van + der woninghe_ ter straten waert / en_ dat daer toe hoert / es gheuallen jn deele der vorgheseider lisebetten en_ wouteren haren man / en_ dander helft van dier woninghen achterwaert met al dat daer toe hoert / es gheuallen jn deele der vorgheseider agneesen en_ lodewike haren man / en_ al na dat de meer die woninghe tuschen vore en_ achter bescheedt / ghelijc dat wettelec ghemeert en_ ghepaelt es / En_ es te verstane / dat de vorgheseide lodewijc sal moghen maken op dat he_ ghenoechlec es en_ hi wille / van + den enen Meere ten andren also verre alst bemeert es / opt sine eist thun ochte glent / welc hi wille / En_ de vorgheseide_ woutre sal moghen maken op dat he_ ghenoeght en_ hi wille vortane toter straten opt sine also verre alst ghemeert es / eist thun ochte glent / welc hi wille / na dat de meer bewist / En_ in Manieren dat de vorgheseide agneese en_ lodewijc hare man en_ hare ghesinne selen haren wech hebben op lisbetten en_ wouters deel van Sesse voeten wijt / ter vordster porten en_ ter straten waert vte te gaene / ter welker porten de vorghenoemde lisbette en_ agnees en_ hare ma_ne en_ Momboren vorghenoemt / hare slotele alleens hebben selen / en_ de vorgheseide lisebeth en_ woutre hare man en_ hare ghesinde sele_ hebben haren wech achterwaert ten borne~putte / ghelijc lodewike / en_ ghelijc dat de wech nu gheleghen es / dats te verstane / tuschen der cameren en_ der Cokenen achter / viere voete wijt / drie dwerse vinghere Min / En_ beide de vorghenoemde partien selen altoes vortane den borne houden op haren ghemeinen cost / het en waere ocht die borne eneghe faute ochte eneghe Crenkenesse hadde van lodewijcs weghen / dat openbare ware / dat dat die lodewijc beteren soude / Vort en sal engheen van beiden den vorgheseiden partien te_meren vorder dan tuschen he_ ghemeert es / noch en sal also moghe_ te_meren engheen van beide den partien / dat doen den andren siin licht beneme_ moghe / . Hir ouer waren alse scepenen van brussele her gherem ser hemcards / en_ her reynere Egloy / die hare seghele hebben ghehanghe_ an dese lettren / jn kennessen der waerheit / van allen den vorgheseiden dinghen / Dese letteren waren ghemaect en_ ghegheuen jnt jaer ons heren alse me_ screef . M . ccc . dertiene / sdisendaghs vor onser vrouwen lichtmesse / - -