Corpus Van Reenen-Mulder (CRM14): Oorkonde P065p32601

Allen den Ghenen die dese lett_en zien selen en_ horen lesen . . Deken en_ Capittele van + d_ kerken sente Goedelen in bruecelle . Scepene_ . Raet en_ de goede liede ghemeinlec van + d_ seluer stat saluut in onsen h_e met kennessen der waerheit / Omme al die discorde en_ Tuiste die dicwile gheweest hebben / en_ namaels wesen mochten / Tuschen ons Deken en_ Capittele in deene side / En_ ons . . Scepene_ Raet en_ de goede liede ghemeinlec van + d_ vorseid_ stat in dand_ side / te satene en_ in goeden pointe te settene / alse van + den Cleed_en kersen en_ and_en gheuallen van + den liken en_ vutleeden die ghebroken hebben en_ namaels ghebruken selen des voerdeels en_ der Erachtecheiden des coers van + d_ vorseid_ kerken Sente Goedelen / daer in staen en_ gheset selen werden / Soe hebben wij eendrachtechlec / met Ripen en_ vorzieneghen Rade / omme goed van jonst en_ van eendrachtecheiden / hier af eene ordinance en_ statute ghemaect / ghesedt en_ gheordineert / ghelijc dat hier na bescreuen es / De~welke ordinance en_ statute wij gheloeft hebben en_ gheloue_ ghemeinlec en_ elc van ons in goeden Trouwen / vor ons / onse oir ende nacomelinghe vaste ghestade en_ onbesmettelec te houdene vortmeer te Euweleken daghen sond_ arghelist / JErstw_ue_ setten wij en_ ordineren / So wat like ochte vutleeden ghebruken sal der vriheiden / Svoerdeels en_ d_ Eersamheit van + den vorseiden coere / daer in staen / gheset en_ begaen sal werden / Soe waer ochte in wat steden dat_ begraue_ en_ ter Eerden ghedaen werdt / Dat wij deken en_ Capittele ghemeinlec van + den keersen die omme dlijc en_ duutleede selen staen / en_ van + den cleed_en die daer toe behoeren / diere op selen ligghen / behouden en_ hebben selen die eene helft / En_ de vorseide kerke van Sente goedelen te haren werke / en_ behoeften de andre helft / vteghenomen den Cleed_en / keersen / en_ alrehanden andren gheuallen die Comen selen van vri Edelen lieden die in den vorseide_ coer staen selen / En_ groten tortisen / cleinen keersen en_ Offeranden van allen den vorseiden liken en_ vutleeden / die ons deken en_ Capittelen vorghenoemt gheheellec en_ al bliuen selen en_ toe~behoeren / vteghesceeden oec allen den cleed_en / keersen en_ andren gheuallen / van clerken die s_bdyaken sijn ocht daer bouen ghewijt / die ons deken vorghenoemt van ouder Costumen en_ sond_lingher priuilegien alleene selen bliuen en_ anehoeren vort o_me~dat wij niet en willen / dat de Cauchiede van bruecelle / En_ de brued_scap mijns h_en Sent Eloys yet ghecranct ochte gheuert Sijn van haren Rechte dat Sij van ouds hare hebben bracht / maer dat Sij ghesterct werden in salenghen werken en_ in allen goeden dinghen / Soe setten wij v_cleren en_ ordinieren dat de Cauchiede vorghenoemt sal hebben / tvierdendeel van + d_ weerden van + den keersen die omme dlijc en_ duutleede selen staen / van den port_en port_ssen en_ simplen clerken die in + den vorseiden coer ghesedt selen werden / En_ de brued_scap mijns h_en Sente loys sal haer Recht hebben van Elken port_e port_ssen van bruecelle en_ simplen clerc die in + den vorseiden coer ghesedt werdt / ochte daer duutleede in den vors_ coer af ghedaen werde / die in die brued_scap es mijns h_en Sente Eloys / Ende der vorseid_ port_en / pot_ssen en_ simpelre clerke goed / oir / vriende / ochte nacomelinghe selen ghilden en_ ghenouch doen metten horen / der Cauchieden / en_ der brued_scap mijns h_en sent Eloys vorghenoemt / van haren Rechte dat Sij tote hare ghehadt hebben / behoudenlec altoes dien / dat ons deken en_ Capittelen / die eene heelft / en_ der vorghenoemd_ kerken te haren werke dand_e heelft / van Cleed_en en_ keersen / van porters port_ssen en_ simplen clerken / die in + den vorseiden coer gheset Selen werden / Euwelec en_ altoes / cleerlec en_ onghemindert bliuen sal en_ anehoeren / ghelijc dat bouen bescreuen es / jn orconscapen en_ vestinghen van welken dinghen / wij onse ghemeine seghele ane dese lett_en hebben ghehanghen / Die ghemaect waren en_ ghegheue_ jnt jaer ons h_en doe men screef dusentech drie + hond_t sesse en_ Tuintech / Sdisendaeghs na Sent_ claus dach in wintere