Corpus Van Reenen-Mulder (CRM14): Oorkonde P065p34301

Cont si allen lieden dat wi beatrijs meestersse van Sente jans gasthuse in bruesele brued_e en_ Sust_e van den seluen conuente gheloeft hebben en_ ghelouen vore ons en_ onse nacomelinghe alse meestersse brued_e en_ Sust_e ten tide nv ochte die namaels ten tide wesen selen / h_en wille_me van duuenvorde h_e van oesterhout Ouermids vijf scellinghe grote jaerlijscher Renten / die hi ons bewijst heeft jaerlijcs op te heffene en_ tontfane ane die husearmemeesters van Sente ghodelen / van welken vijf scellinghe g_te vorescreuen wi jaerlijcs vte~gheuen selen tote Eere pietancien te broede te Spisen / en_ te wijne / den armen zieken die daer int vorseide gasthuus sijn selen / en_ den joncf_ op den asschdach / en_ die Capellaen sal hebben van den vorseiden vijf scellinghe g_te viere peninghe g_te op den seluen dach / dit es te verstane alsoe langhe alse her willem van duuenvorde vorscreuen leuet / En_ na sine doet sal + men dese gheheele pietancie deilen op dien dach dat sijn jaerghetide vallen sal / en_ dan sal die capellaen doen sijn jaerghetide / en_ bidden vore hem in sire messen / en_ doen den armen sieken die de pietancie hebben selen narnstelike sijns ghedinken en_ vore hem bidde_ En_ kennen op ons en_ onse nacomelinghe van den vorghenoemden gasthuus / gheuielt dat niet wesen en moet / dat wi niet en daden alse vorscreuen es / alsoe verre als ment wetteleke op ons beproeuen mochte dat wi dies jaers naest volghende niet hebben noch op~heffen en mochten van + den vorseiden vijf scellinghe g_ten in negheerre manieren / jn orconscape der waerheit beseghelt met onsen ghemeinen seghele Ghegheuen jnt jaer ons h_en Dusent Drie + hondert drie en_ viertech op Sente dyonijs auont