Corpus Van Reenen-Mulder (CRM14): Oorkonde P065p34304

Cont si allen lieden dat wij jan calenoert en_ jan danijs huusarme~meestre van Sente gilijs tobbruesele gheloeft hebben en_ ghelouen vore ons en_ vore onse nacomelinghe alse huuse~aerme~meesters ten tiden nv ochte die namaels ten tide wesen selen / heren wille_me van duuenvorde here van Oesterhout / ou_mids Sesse scellinghe grote jaerlijcscher Renten die hi ons bewijst heeft jaerlijcs op te heffene en_ tontfane ane die huusearme~meest_s van Sente guedilen / van + den welken Sesse scellinghe g_te vorscreuen wi jaerlijcs deylen selen en_ gheuen jn alre zielen daghe / te Rocken / den alre~armsten / en_ noettorfsten van der prochien van Sente gilijs vorseit o_me eweleken vore hem te biddene / en_ kinnen op ons / en_ onse nacomelinghe alse husearme~meesters / gheuielt dat niet wesen en moet / dat wi niet en daden alse vorscreuen es / alsoe verre alse ment wetteleke op ons beproeuen mochte / dat wi dies jaers niet hebben noch heffen en mochten van den vorseiden Sesse scellinghe g_ten in negheerre manieren / jn orconscape der waerheit beseghelt met onser husearmer zeghele Ghegheuen jnt jaer ons h_en / Dusent / Drie + hondert / Drie en_ viertech op Sente dyonijs auont -