Corpus Van Reenen-Mulder (CRM14): Oorkonde P065p35604

Cont si allen lieden dat ic amelrec de pape prouesoer der husarm_ te sente gorex hebbe ontfaen ter armer behoef een huys mett_ hofstat ouer eyghen welc huys en_ hofstat wilen was Claus van eeke gheleghe_ in de volderstrate . tussche_ de goede jans Mols op deene side en_ jan scoteluoets op dand_ side . welc huys mett_ hofstat gheset en_ gheprijst es op tsestech florine_ cleine van florense jaerlyx erfeleke . van welken tsestech cleinen florine_ voerghenoe_t . wi amelrec de pape en_ laureins de wedeghe prouesore d_ husarm_ van sente gorex gheloue_ van + d_ armer weghe_ erfeleke te sente gorix der kerken ene_ florijn van florensen na de doot Mergriete_ claus wijf van eeke was . Met alsulker vorwaerden worde dat sake dat dit voerghenoe_de huys en_ hofstat af~name en_ niet volbringhen en mochte noch hebben en mochte de tsestech florine voernoemt . so soude de kerke voerseit af~slaen ghelande ghelijc van hare_ florine En_ beterde dit vorghenoe_de huys en_ hofstat en_ meer goude dan de tsestech florine so soudse meer heffen na haer ghelande Om~dat dit goet en_ ghestade sal bliue_ . soe hebben wi amelrec en_ laureins prouesoers voernoe_t der husarm_ zegel hier ane ghehanghe_ Jnt jaer ons h_en . M . + ccc . + viftech en_ zesse in de Maent van oegste . -