Corpus Van Reenen-Mulder (CRM14): Oorkonde P065p38801

Allen den genen die dese l_ren zelen sien en_ hoeren lesen Reyneere geheeten Cluetnic / en_ Gielijs geheeten de mol / Scepenen van Bruesele Saluyt met kinnisse_ der waerheit / Cont sij allen / dat voir ons comen es in sinen propere persone Bartelmeeus geheeten tserarts doudere / en_ heeft op~gedragen / met wittegen vertijene / h_en janne geheeten tserarts priestere sinen neue / alt recht / dat die selue Bartelmeeus hadde of hebben mochte / in eniger wijs / in allen en_ yegewelken den goiden veruerleken / en_ onveruerleken / Eygenen / Eruen / leenen / en_ allen anderen / vercregen en_ onuercregen vrouwe yden geheeten tserarts wijf wilen was / h_en Michiels geheeten scalijs Ridders / soe waer sij gelegen sijn / ouermids cracht van scepenen~brieuen van Bruessele / sprekende van zes + hondert ponden ouder groten / die de voirs_ vrouwe yde voirtijts geloefde / de voirs_ Bartelmeeuse / of den bringere der seluen brieue / dair met hij gemaent heeft opter voirs_ vrouwen yden / en_ quam tot allen hueren goiden voirs_ / en_ die veranderde in dander hant / en_ vercochte na + der stad rechte / willeme sinen sone / dair hi + se nader~hant weder yegen gecreegh / De~welke brieue van zes + hondert ponden groten / metten anderen brieuen / die dair vte gespruyt sijn / dats te wetene van + den vonnisse / en_ dair met dat Bartelmeeus voirs_ / die voirs_ goide / willeme sinen sone vercochte / en_ dair hi + se weder met yegen den seluen willeme vercreech / die voirs_ Bartelmeeus den voirs_ h_en janne ouergaf / kinnende / die selue Bartelmeus hem niet meer rechts hebbende noch behoudende / aen den voirs_ brieuen / of goiden / Op alsulke Conditie en_ vorwaerde / dat die voirs_ her jan / geloeft heeft / en_ geloefde / voir ons / den voirs_ Bartelmeuse / te ontheffene en_ te ontslane / jegen yegewelken / van allen costen / en_ lasten / die Bartelmeeus voirs_ / gehadt en_ geleden heeft / omme ocsuyn vrouwe yden voirs_ / gelijc hij voir huer vriende die vercleert heeft / en_ oec van + den geloeften / die Sij den voirs_ Bartelmeeuse / en_ Bartelmeeuse sinen sone gedaen sijn / daer her Eueraert geheeten voete / en_ her Anthonijs geheeten de wisseleer Ridd_en Borgen af sijn / En_ van alsulken geloeften alse van + der zoenen / der zaken ruerende van willeme van + der loegen / die gesciet sijn / tot opten dach datum dis briefs / en_ jegen den wenne van bossut / van alsulker staden / alse + men vint / dat die wenne gestaedt es / bij willeme van + der loegen / ocht van sinen wegen / en_ dair hem Bartelmeeus douder af soude restoer doin moeten Jtem heeft noch op~gedragen met wittegen vertijene / die voirs_ Bartelmeeus douder den voirs_ h_en janne priestere alt recht / dat die selue Bartelmeeus douder hadde / of hebben mochte / in alsulke brieue / alse hij ontfaen hadde / van + den voirs_ priestere / dair met de selue priestere gedaen was / tot allen den goiden / wilen h_en Michiels geheeten scalijs / De~welke brieue / die voirs_ Bartelmeeus douder / den voirs_ priest_e te~liuereerde en_ ouergaf / kinnende de voirs_ Bartelmeeus douder / hem niet meer rechts hebbende noch behoudende in enigen van + den voirs_ brieue_ ocht goiden / Behoudeleken dien / dat die voirs_ priestere metten voirs_ brieuen / sprekende van + den goiden h_en Michiels voirs_ hulpen en_ bistaen sal / des voirs_ h_en Michiels Testamentoren dat sijn testament volvuldt werde / Jn getugenissen der waerheit van welken dinghen voirscreuen / hebben wij scepenen voirs_ onse zegele desen l_ren aengehangen / Ghegeuen jnt jaer ons h_en als + men screef Dusentich drie + hondert . acht ende tachtentich / opten and_en dach der maent van junio