Corpus Van Reenen-Mulder (CRM14): Oorkonde P065p38904

Allen den ghenen die dese jeghewardige l_ren zien selen ocht ho_en lesen willem Cassart gheheten Plaetman ende Gielijs van Hamme Scepen_ van Bruessele Saluyt met kennissen der waerheit Cont zij allen dat want descourt ende (-) op (-) waren tusschen janne van ysche gheheten tsmet zone was godeuarts van ysche jn deen zide ende Henrike den beck_e sone wilen was willems beck_s in dand_e zide als van enen weghe gaende van + der brugghen toter moelen des voirs_ jans van ysche geleghen te Scarenbeke die van van + den heren der Capit_len van sente Goedelen van Bruessele terue houdende es welken wech voirs_ de voirs_ Henric de beck_e meynde dat hi mar viere voete wijt en soude hebben gheweest Ende oec van enen bekene ane die voirs_ brugghe voer den wech voirscr_ te zine Ende dair toe oec van + den waterleyde van + d_ beken aldair die de selue Henric der voirs_ moelen ontbeydt hadde op ziin erue aldair gelege_ ende van anderen zaken dair af ruerende dair af heme de voirs_ jan van ysche becroenende was dat heme de voirs_ Henric aen zijnre voirs_ moelen ende goeden aldair onrecht ende onghelijc dede Ende dies ghelijx de voirs_ Henric weder heme becroende van + den voirs_ Janne . . Soe eest dat daer omme de voirs_ Jan van ysche Jn deen side ende Henric de beck_e Jn dand_e voir ons comen siin in prop_en p_sonen / ende hebben bekint ende verlijt als dat sij bij rade ende toedoene goeder beschedenre liede dies hen onderwonden hebben hen te slytene ende tusschen hen te sprekene goede voerzienicheit / ende rypen raet met alrehande vercleernissen dair op ghehadt van allen zaken voirs_ onderlinge ende met malcand_en veryffent ende verenicht siin Jn + der mani_en hier na volghende . . Dats te verstane . Jn + den yersten dat de voirs_ wech aldair gaen sal ende bliuen gaende van + der voirs_ brugghen toter moelen voirs_ . Jn alle der voeghen dat hi dair tot heer toe ghegaen heeft / ende ghelijc oec der Scepen_~brieue van Bruessele dien altoes in hu_e volre macht bliuende in~hebben / die dair op ghemaect siin . . Met zelke_ vorwarden dat de voirs_ Jan ende henric Een beken ane de brugghe voirs_ voer den voirs_ wech ghelijc voerscr_ es aldair selen doen maken / op hu_e beyde_ cost . viere voete hoeghe ende viere voete breet ter voirs_ moelen enen yegheliken te comene / te vaerne / ende te keerne met eenre Clincken van buten ende van binnen te slutene ende op te doene . welc beken voirs_ de selue henric ende Jan / ewelic vortane / op haren cost ghemein wel ende louelic houden zelen / Ende dat de vors_ henric Jn + den vors_ wech op + den cant van + d_ beken aldair / tusschen de vors_ brugghe ende de arke aldair sijnde / hebben zal ziin houwen / ende zetten alsoe dicke alst hem ghenueghen zal . . Behoudelec dien dat de selue Henric en~ghene boeme also na der voirs_ arken / en sal moeghen zetten / als waer + bij dat der arken / ende moelen voirs_ dair af enighen commer of hindernisse comen moeghe hier~namaels in gheenre voeghen / Oec es ondersproken dat de voirs_ Jan / ende Henric / de twe boenre aldair staende / de ene in dene zide va_ der voirs_ Arken ende dande_ in dand_e zide onder hen ghemeyne staphans zelen doen houwen / ende thout dair af comende enen + ghelijc deylen . . Ende sal altoes de vors_ Henric / den voirs_ wech / ende den Dam aldair toter vors_ Arken toe wel ende louelec houden op sinen cost als waer + bi datt_ der voirs_ moelen en~ghene scade af en ghescie / Met zelke_ conditien dat de voirs_ Jan van ysche van + der voirs_ arken ter vors_ sijnre moelen beho_ende derue dair gheleghen tusschen beyde de beken aldair toter voirs_ molen toe / ewelic vortane hebben / ende behouden sal te sinen orbo_e ende profite / ende dair op houwen / ende zetten also dicke alst hem ghenuegen sal . . (-) + bouen bekinde de voirs_ henric / dat hi ane thout staende op den dam ane dander side van + der moelenbeken aldair ter heerstraten wart en~gheen recht en heeft / noch en behout in gheenre manieren . . Welke zaken pointe / slytinghe ende effeninge voerghenoempt / de voirs_ Jan van ysche in deen zide ende henric de beck_e vors_ in dande_ voir hen hu_e oire ende nacomelinge_ malcanderen gheloeft hebben vast ende ghestade te houdene teweliken daghen / ende dair jeghen nu_mermeer te doen noch te gane / bi hen ocht yemene anders in enighere voeghen / Ende dair voer hebben sij deen dand_en gheset ende verbonden tenen zek_en onderpande Alle hu_e goede eyghene / ende haue vercreghene / ende onuercreghen Ghelouende malcand_en dair af waerscap / ende altoes ghenoech te doene op~datt_ yet ghebrake . . Jn Orconden van welken dinghen . Soe hebben wij Scepen_ voirghenoempt Onse zeghelen ane dese l_ren doin hanghen / Ghegeuen jnt jair ons Heren . M . CCC . Tachtentich / ende Neghene . Opten Drie ende twintichsten dach der Maent van Septembr_ -