Corpus Van Reenen-Mulder (CRM14): Oorkonde P088p32301

Ane alle Die ghene Die ghene die dese letteren selen zien en_ horen lesen die nu sijn en_ namaels sijn selen / Scepene Ghesuorne En_ die Raet van + der stad van louene salut en_ kinnesse der waerheit / wi doen v allen te + wetene dat wi o_me ghemein Orber der stad en_ met ghemeinen consente ghemaect hebben en_ gheordineert die pointe die hier na staen bescreuen vortaene vast en_ ghestedech te houdene / Jrstwerf dat nyman die vortaene der stad knape sijn sal / op dat jaer dat hi der stad knape es en sal moghen dranc vercopen noch gheselle sin ane dranc noch tauerne houden jn eengher maniren noch oec molene te pachte nemen / noch houden noch geselle sin ane molene / ende soe wie dat dade hi soude verboren sinen dienst van der stad / alsoe dat hi van dan vortaene nimmermeer jn + der stad dyenste en soude moghen comen / Jtem dat en~gheen man op dat jaer dat hi ghesuoren sin sal van + d_ stad van louene enghene molen te pachte en sal nemen noch houden noch gheselle sijn daer ane jn eengher manire_ ende soe wat manne die ghesuoren wart van + der stad / op enech jaer molene ochte molen te pachte name ochte te pachte hielde ochte gheselle waere daer ane dat hi ter stad orbore niet en soude comen moghen noch ghedaecht sin daer ouer te + comene noch te ghenen orbore dat der stad ane~ghinghe / ende alsoe oec dat men elken die ghesuoren sin sal vortaene alse hi sinen eet doet / sal mede doen sweren ten heyleghen dat hi op dat jaer noch molene te pachte en heft noch nemen en sal noch gheselle sijn daer ane jn eengher maniren / Vortmeer dat soe wie die erf~molene heft die ghesuoren sin sal . dat hi op dat jaer dat hi ghesuoren es niet en sal weghen den beckeren hare broet noch die waghe draghen noch in handen hebben . Ende o_me~dat alle dese dinghe ghemaect sijn en_ gheordineert met ghemeinen consente o_me orber der stad ende vortaene vast en_ ghestedech selen werden ghehouden / Soe hebben wi . . Scepene ghesuorne en_ raet van + der stad van louene voreghenoemt der stad seghel ane dese l_ren ghehanghen Ghemaect en_ ghegheuen jn de jaere ons heren alse men scref Dusentech Drie + hondert ende Dri + en + twintech sfrijdachs vore sinte jans dach Jn + den somer - - -