Corpus Van Reenen-Mulder (CRM14): Oorkonde P176p34401

Et si cont en ygheliken di desen brive Ende dit jnstrument Solen Siin Ende horen dat in den jare ons h_en dusentech drie + hondertech vire + en + viertech / En + der twelfder jndictien zeyrstes + dachs van december / En + der p_ncien mins notaris Ende vore den Scepene_ der stat van Sentruden / als ghetughen Ende heeldere_ onder gheschreve_ / daer tue gherupe_ Specialech ende ghebeden / Staende en Sine_ p_peren p_sone / gotschalc van Repe / Der selve gotschalc / becande o_me ene gherechte_ vredeleke_ ende weetteghen pays / mi_ne / Ende vrede te hebbene tieghen de h_en . buscopt van ludeke . . abt van Sentruden / horen Raet Ende tieghen de stat van Sentruden / Ende tieghen de port_e der selver stat / dat hi hadde / ende heift op~ghegheven gheresigneirt / ende v_teghen oppenbaerlech / volcomelech / mit Sine_ wille / Ende ombedwonghen Siin Raetmanschap / dwelech hi hijlt / ende haudende was be_nen der stat / Ende benne_ der vriheit van Sentruden / Ende ne_mermeer na ambacht / als Scoutich~ambacht / Scepen~stuel / ocht Raetmanschap der heirheit der h_en / Ende der stat van Sintruden tue~behorende / na te stane ocht te haudene / en ware met c_sente wille gratie / Ende met ghenade der h_en . . Sbuscopts . . Sabts / ende der stat van Sentruden voreghenoempt / ghezament eindrechtelech / Ende niet ghezundert / ende dat heift ghesworen der selve gotschalc oppenbaerlech ten heyleghen / Ende gheloeft met trouwen en einre stat van eede als meynedech te zine ende trouweloes / Ende op enen panden van vitegh ponden grot + t_nose der moente_ Sconi_x van frankerike ander / dese zake_ weettelech te haudene den h_en / ende der stat voreghenoempt / ghelijch na ghelanch te reikene / ende te v_gheldene / weert dat hi hiir tieghene dade ocht ghebrechlech worde voenden . Ende weert dat me_ home hiir ane beteghe / So mocht hi home onschuldeghen ten heyleghen / ende zonder arghelijst / Ende en wouder des niet doen / So weer hi op te pine / Ende op den panden voreghenoempt . Jtem vort so gheloefde der Selve gotschalc met trouwen / en einre stat van eede als meynedech te zine / Ende swoer ten heyleghen en allen der vormen / ende maniren / ende op ten panden voreghenoempt ne_mermeir met c_sente / wille / ocht bewervenisse och v_zuken ziins / tieghen de h_en . . buscopt . . abt / horen Raet / stat van Sentruden / port_e der selver stat ene_ ocht allen / di nu Sijn / ocht namaels Siin moghen o_me dese zaken Ende poente voreghenoempt / ijet te betiene / te done / te lettene / te krenckene / met bew_venisse ymans met Sine_ t˚edone Ende op te pine / ende panden en der maniren voreghenoempt Ende zonder arghelijst / Ende scaut die voreghezede h_en / horen Raet / stat / Ende port_e der Selver stat / di Siin / ocht Sijn moghen / vore home selve / Ende vore Siin maghe / ende vrinde / Ende vore Siin eerven van allen desen zaken Ende poenten / los / Ende altemale quite Ende dat weettelech ende volcomelech / en maniren van payze / ende van zoenen te haudene Ende wert dat zake / dat mer home van desen zaken / ocht poenten hi voreghenoempt in allen / ocht en ene_ dele beteghen zonder volcomelech weettech ghetughenisse discreter eyrzamer weettegher p_sone / So mocht hi home / met siins Selfs eede ten heyleghen onschuldeghen Ende zonder arghelijst / Ende waer hi des niet en dade / op te pine / ende panden voreghenoempt / Ende alle deze zaken voreghenoempt / gheloefde der selve gotschalc / en der hant mins notaris her onder ghescreve_ / en orcunde der Scepene_ als helderen Ende ghetughen na volghende / di dat nam volcomelec van + den selve_ gotschalc en maniren van rechte met Sine_ lichghamleker trouwen en einre stat van eede / Dese zaken / Ende poente / ocht gheloeften in allen der vormen ende maniren voreghenoempt te haudene weettelech / Ende niet daer tieghen te done noch over~midts home / ocht ymans anders met Sine_ wille / c_sente / tue~done / och beiaghenisse / Ende dat op te pine / ende panden voreghenoempt / Ende zonder arghelijst / Ende v_teght alle reche gheystelech / ende werelech bedrochghenisse exceptien Subtilegheit generale renu_tiatien / aude voende / nuwe voende / lett_en / g_tien / p_vilegien te orwervene / ocht de orwerven Siin / Ende alle andre loye / Ende rechte di home hiir tieghen stade mochte_ doen ocht hulpe / Ende den h_en / der stat ocht den porteren voreghenoempt onstade / waer bi dat dese voreghenoempde zaken / poente / gheloeften / Ende v_bonde / en allen / ocht en ene_ dele ghebroken woerden gheschoert Ende ghea_nuleirt / Ende o_me ene meirre zekerheit allen der zaken voreghenoempt / So bat di selve gotschalc mich notarize met Sine_ p_peren wille dat jch hiir op maghde drie jnstrumente van einre tenoren / den buscopt ein / en den abt ein / Ende der stat van Sentruden voreghenoempt ein met minen tekene / te tekene / Ende te bezyghelene / met Sine_ c_sente / Ende beeden / metten zyghelen discret_ persone / lambrechts scoutiten / jans silkens / willems van Coni_xhem / Ende henrix vte bruce Scepene_ der stat van Sentruden Ende helderen / Ende metten zyghele des selfs gotschalcs ghezyghelt te_ eende voreghenoempt / en ghetughenisse der waerheit allen der zakene voreghenoempt Ende wi lambrech / jan willem Ende henric Scepene_ der stat ende held_en voreghenoempt / ter beeden gotschalcs voreghenoempt hebbe onse zyghele desen jnstrumente / met gotschalcs zyghel voregheseght ende met ten tekene Snotaris onderghescreven ane~ghehanghen en ghetughenisse der waerheit allen der zaken voreghesegt Dese zaken waren ghedaen be_nen der selver stat van Sentruden / En + de jare Ende jn + der jndictien / maent / ende dach voreghenoempt - End jch johan pet_s van Sentruden gheheiten van merwele prist_e van + den busdom van ludeke van cheylechrix weghen notaris want jch aller der zaken voreghenoempt mette_ Schepene_ bove_ gheschreven alse held_en ende ghetughen / ane / ende bi hebbe ghewest / dit jnstrument daer op met c_sente Ende wille gotschalcs voreghenoempt hebbe ghemacht ghezyghelt met zyghelen der Scepene_ / ende gotschalcs voreghenoempt / Ende ghetekent met / minen tekene ghebeden