Corpus Van Reenen-Mulder (CRM14): Oorkonde P176p38401

Wy johan van N˚ys den men heyt van Niel En_ arnout van den Dyke Schepenen der stat van Sintruden doen cont allen luden dat voer ons comen siin Bruder johan van muysen groetmeester te herkenroyde van der eenre siden Ende Godiin en_ Johan godijns siin neve te wilre vonende van der andere siden / Die voerseyde bruder johan kende En_ lijde dat hi met weten c_sent en_ wille onser liver werdigher in god vrouwen by der g_tien goeds Abdissen en_ Co_vents van herkenroyde o_me p_fijt en_ orber des selfs Co_vents heeft ghegheven en_ verleent / den voers_ godine en_ johan Godijns die kenden dat sy ghenomen hebben tot eenre ghetoust van twelf jaren vloechs en_ naest volghende na half merte dat was int jaer van drie en_ tachtentich lest~leden den hof met der wi_ninghen en_ teenden van wilre als verre als die den goetshuse van herkenroyde toe~behoren jn voeghen dat die voerschr_ vrouwe Abdisse en_ co_vent sullen b˚yten desen voerwerden behouden tgeyse en_ cap˚ne die men h˚n te wilre en_ daer o_metrent jaerlijx schuldich es te houden en_ te vi_nen te wennen rechte te weten jaerlijx die wi_ni_ghe o_me vijftich Mudde terwen en_ vire en_ Twintich Mudde rogghen maten en_ pachs van Sintruden welke we_ninghe helt ghemetens lands Twee en_ dertich boenre drie groet ruden en_ seven cleyne maten van wilre ghelijc dat h˚n die we_nen van der maten voer ons co_tent hilden Ende die tiende jaerlijx o_me twee en_ tzestich Mudde rogghen en_ twee en_ tzestich Mudde ghersten Teen pont was Twee pont pepers twee pont caneels en_ twee pont gheyngberns drie Mudde witter en_ drie Mudde royder Erten weligher tienden termijn begonste als bruder johan voerschr_ kende op sinte johans messe baptisten lest~leden na ghewoente der kerken van ludic Te betalen jaerlijx te weten den pacht van der tienden te herkenroyde op arbeyt der we_nen ende cost des Co_vents van herkenroyde . als van~auts ghewoenlijc gheweest heeft Ende van der we_ninghen voerschreven sintruden op vrien cost en_ arbeyt der we_nen voerschr_ alsoe dat die we_nen jaerlijx sullen beghi_nen den voers_ pacht te betalen sinte andries messe en_ te peynxten dan vloechs volghende voltaelt jn voeghen weert dat h˚n te peynxten breken tot vire en_ Twintich Mudde rogghe_ dat men h˚n derre sal beyden tot den naesten jare en_ sullen dan dat ghebrec betalen met den nuwen pachte . Ende es te weten dat men den we_nen alsus bi_nen dese_ ghetoust niet meer dan drie~warven beyden en sal haer ghebreec daer sy te peynxten in vonden sullen werden Ende es verdedingt dat die we_nen sullen laten ten lesten iare van der ghetoust allen die weynde en_ half die broeke die deser we_ninghen toe~behoren eens gheackert en_ den aert van den wintercorne beseyt te we_nen rechte want sy den selven aert hebben vonden beseyt En_ sullen och die we_nen allen die gude van der we_ninghen laten ghevreet ghelijc reeghenoeten En_ die Mure en_ grachte van den hove wel en_ wettelijhc ghedeckt en_ ghehouden En_ sullen die selve we_nen och ten inde van den lesten iare laten in den hof allen mest en_ stroe van den erve van herkenroyde dan comen als verre als dat erve der we_ninghen en_ niet der tienden toe~behoert Ende sullen Och allen die husinghe stelle en_ schuren van den hove dese ghetoust durende houden van dake en_ van wanden ende laten ten lesten iare ghedeckt en_ gheplackt te we_nen rechte Maer weert dat an den hof bi_nen deser ghetoust ghebreke ti_merwerc dat sal custighen en_ doen maken dat cloester van herkenroyde voers_ Och hebben die we_nen voerschr_ gheloeft by truwen te bewaren en_ te v_antwerden na haer macht reene en_ recht des goetshuys van herkenroyde voers_ En_ hebben die we_nen van deser vorwerden in orbere des co_vents te vervolghen recht reen ocht erve schade die sal men h˚n corten van haren pachte naest valle_de behoudelijc dat sy dat cont doen den goetshuse te herkenroyde . Voer welke voorwerden voerschreven te houden en_ te voldoende in formen voer en_ na gheschreven die selve we_nen kenden dat sy met hove en_ met he_e hebben simpelijc sonder sy gheg˚t joh_es ghersten tot orbere des goetsh˚ys van herkenroyde in zekere gude onder gheschreven in deser moeten en_ voerwerden weert zake dat die we_nen ocht eynich van h˚n op eynich jaer van der ghetoust voerschreven s˚mich weren in der talinghen als boven gheschreven es dat dan Onse vrouwe van herkenroyde ocht haer zeker boyde sal moghen vercopen van den guden ondergeschreven dat den s˚meghe_ toe~hoert dwelighe dat h˚n alre~ghereetst sal siin ghelt an te nemen o_me te vercrighen allen dat ghebrec daer die s˚meghe in vonden sal moghen w_den En_ dan sullen die we_nen die we_ninghe en_ tiende voerschr_ van n˚wens met panden ocht met borghen verpanden alsoe g˚t als sy op desen dach verpant en_ verborcht siin En_ dat sullen sy alsus doen als decke als die gude alsus verkocht siin Ocht woer sy daer in s˚mich weren boven een maent na~dat die we_nen daer toe van ons_ vrouwen van herkenroyde zekeren boyde versocht sullen werden dat onse vrouwe van h_kenroyde dan sonder ymans wedersegghen sal moghen wider anverden haren hof lande en_ teende voers_ en_ dan haren orber daer mede doen En_ die we_nen sullen dan als sy der we_ninghen en_ tienden alsus quijt siin haren orber en_ p_fijt moghen doen met den erve dat daer noch sal dan siin te v_copen als die schout al betaelt sal siin En_ dan sullen die we_nen op haers selfs cost wider in dese onverkochde gude met hove en_ met heere gheg˚t werden / Dit siin die gude daer boven mencie af ghemaeckt es die de we_nen voer die hove joh_es ghersten in name als boven gheschreven es gheg˚t hebben En_ ten eersten godijns gude Jn den eersten een half boenre lands gheleghen op den keyberch an die strate die gaet van wilre te duras by lande des he_en van duras op die een side En_ lande der kindere van lille op die andere syde dat men hilt van den he_e van duras voers_ in sinen hof te ru_keren jtem een en_ twintich groet ruden lands gheleghen tusschen wilre en_ staden tusschen lande johans van landen van der eenre siden en_ des he_en van duras voers_ en_ willems van meerhout schepens sintruden van der andere siden Ende dese een en_ twi_tich groet ruden lands hilt + men van ons_ vrouwen hove te wilre Jtem een half boenre lands gheleghen by wilre tusschen lande des goetsh˚ys van herkenroyde op die een side en_ des p_soens lande van wilre op die and_e side dit half boenre lands hoeft voer schoutete en_ schepenen te wilre / Die lande di johan godijns voers_ heeft gheg˚t volghen jn den eersten seven groet ruden lands gheleghen by wilre tusschen lande der scholire van leuwe van der eenre ziden en_ godijns van wilre voerschreven van der andere siden en_ hoven in des greven hof van loen te duras Jtem seven groet ruden lands gheleghen by wilre tusschen lande godijns voers_ van der eenre ziden en_ heyleven henrich godijns wijf was van + der andere siden En_ hoven voer onser vrouwen hof te wilre Jtem vier groet ruden lands gheleghen by die haghe op die strate die gaet van wilre te nederhoven tusschen lande des Co_vents van herkenroyde op die een side en_ johans populers op die andere side en_ hoven voer tgherichte te wilre Jtem vier groet ruden lands gheleghen an den valgader te wilre op den wech sintruden weert tusschen lande des Co_vents van herkenroyde van beyden siden En_ hoven voer schouteyt en_ scepenen te wilre Jtem vijf groet ruden lands op die selve stroete sintruden weert tusschen lande des co_vents van herkenroyde van der eenre siden en_ henrich borghers van der andere siden En_ hoven voer die selve schouteyt en_ schepenen te wilre Jtem twelf groet ruden lands gheleghen opt voetpaet achter die kerke van wilre op die zide te boedenhoven wert by lande der scholire van leuwe op die een zide en_ lande des p_soens van wilre van twee siden en_ hoven in des he_en hof te wilre Jn welker dinghen ghetuyghenisse hebben wy johan ende arnout schepenen voerschreven desen en_ anderen l_ren van den selven tenoer ter beden bruder johans en_ der we_nen voers_ onse sighele anghehanghen Dese dinghen siin gheschiet int jaer doen men schreef na der gheburden ons he_en Dusent drie h˚ndert vire en_ tachtentich in aprille xxj daghe .