Corpus Van Reenen-Mulder (CRM14): Oorkonde P197p38301

Wij Gereet here van heere Riddere doen cont allen luden en_ bekennen openbaerlic mit desen brieve dat ons onse lieve en_ genedige h_e en_ vrouwe die hertoghe en_ hertoginne van lucemb_ . en_ van brabant volcomelich betaelt hebben van allen afterstelligen renten die si ons en_ onsen lieven soen heren johan_e h_e van pyt_sheim dien god genade sculdich mochten sijn tot op den daech van huden van + den Renten die wi hebben en_ onse vors_ soen te hebben plaech opten tol en_ Reenten van Tricht . en_ van + den hove van lencule . fleytingen en_ van heze En_ bekennen ons daer af te vollen gnoech wesen ghedaen Scheldende daer af quijt en_ los onse vors_ lieve en_ ghenedige h_e en_ vrouwe van brabant horen Reenmeester en_ toln_en van Tricht en_ alle hair lude en_ lande teweliken daghen behaudelich ons den brief en_ scolt van duse_tich Mott˚nen die ons onse vors_ ghenedige h_e en_ vrouwe van brabant bekeent en_ verborgt hebben dat si ons die betalen suellen jn + der voeghen dat vors_ brieve die wi van hun daer op hebben begripen allen argelist wtghescheiden jn orconde en_ vesticheiden welker dinghe wij ger_ h_e van he_e vors_ hebben onsen seghel aen desen brief gheha_ghen Gegeven tot heere jn + den jore ons h_en dusentich drie + hondertich en_ drie en tachtic des vijfteende + dags van junio .