Corpus Van Reenen-Mulder (CRM14): Oorkonde P518r33701

Wij schepenen van Campenout maken cont en_ kinleec allen den ghenen die dese letteren Selen Sien ochte horen lese_ dat heinr_ de pottere van viluorden heft op~ghedreghen den here van der Capitelen van sente rombouts van mechele een dachmael lants en_ een half lettel men ochte meer es gheleghen bi den alboeme te viuelghem teene_ onderpande ianne vissenbarde van mechele teene_ huis dat gheleghen es te viluorden dat de vorghenoemde heinrec heft ghenomen in erue yeghen yanne vissenbarde vors_ om dertien pont tsars te gheldene te tuen payme_ten dierste telken sente yans messe dander te kersauo_de naest come_de also selc ghelt alse in borse gheet den (onleesbaar) dat dese vors_ payme_te vallen / hier was ouer yan andries en_ yan her + ghisels schepene_ der capitelen vors_ te hockense en_ om~dat dese schepene_ vors_ ne~ghene_ seghel en hebben hebbe wi schepene_ van Campenout vors_ bi beden tshere_ der schepenen en_ van beedden partien vorghenoemt dit beseghelt met onsen schepene_ seghele vte~hanghende / Dit was ghedaen jnt tijaer ons heren doe men screef . M˚ . + CCC˚ . + sesse en_ dertes_ sondaghes vore half~vasten - - - -