Corpus Van Reenen-Mulder (CRM14): Oorkonde P541r31601

Wi Bauderic Heinric van + der Houtmarct , Heinric van Vorst Jacob Scardenbergh , Heinric Desuetere ende Arnoud van Beringhen , scepenen van Dyst , doen cont dat voer ons ende Alarde van + den Driessche onsen medescepene ende richtere ghemaect in deser vorworden , her Jan van + der Lynden dacken van sinte Jans kerken te Dyst , Arnoud Pouwels ende Woutere Dayde cleerke , overmits tverbinden ende die gheloeften die Goeswiin van Lude ende Arnoud van Rommershoven , di + men heet van Kestele , voer hen selven ende voer hoer partisen op heren Arnouds goet was van + den Cruce spersoens van + den beghinen te Dyst ghedaen hebben , gheliker wiis die brieve cont doen dier op ghemaect siin , gheloefden die selve her Jan , Arnoud ende Wouter alse saecwondere hen Goeswine ende Arnoude , waert dat sake dat si Goeswiin ende Arnoud consten gheproeven ter waerheit met wetteghen ghetughen alsi sculdech weren te doene , dat her Arnoud van + den Cruce , persoen voerghenoemt tgoet van Dunghenen op Oexven ende ? , alse sinen maghen ende gheerven tonkeerne den goetshuse van Dongherloe verkocht heeft , dassi her Jan , Arnoud ende Wouder voerghenoemt dat van dien goede dat hen her Arnoud die selve persoen ghegheven heeft , zelen sabds zeghghene van Averbode ende sabds van Dongherloe na de waerheit die so na dghedughnesse vinden , dat + men overmits dien selven heren Janne , Arnoude ende Wouteren sal verhoeren hen Goeswinen ende Arnoude te horen behoef ende hoerre partigen verghelden ende oprichten ende dit zeghghen zelen die heren die abdte binnen heren Arnouds diis voerghenoemdes persoens dertechste met mont sprekene tusschen die voerghenoemde pertigen , op~dat si moghen ende connen utenen ende poenten , ende en magh dijs niit siin , so zelen siid binnen due veertiennachten na dat dertechste naest comende pronuncieren ende zeghsgen bi hen selven ochte si moghen nemen enen overman op~dat siis begheren ende die sal siin die abdt van sinde Myghiels van Antwerpen , op~dat menne magh becrighen ende en mach mens niit hebben , so moghen si die here die abdten enen andren overman dien si willen ende begheren daer toe kiesen ende nemen ende overmits henne hoer zeghsghen pronuncieren welc zeghsghen wilcoerden ende gheloefden die voerghenoemde partigen vast ende ghestadech te hudene ummermeer op enen panduen van dusent ponden suarter tornose , half den besscop van Ludeke ende half den here van Dyst te vergheldene van dier partigen die dad zeghghen braeke ocht in enighen maniren stoerde . In orconde der waerheit hebwi onse sighele aen desen brief ghehanghen in + de jaer ons Heren M CCC ende viftiene , neghen daghe in April .