Corpus Van Reenen-Mulder (CRM14): Oorkonde P541r33601

Wij Jan van + den Velde richteren , Jan van Beringhen , Heinric van Beringhen , Arnoud Voren Larien , Jan Vrient , Jan Billen , Jacob Zadelmakere ende Heinric Snagghum , late zabts ende scovints van Tongherloe binnen Dyeste , doen cont ende tughen dat Lambrecht Hellenspighel becreegh in erfdome wetteleec ende metten rechte tieghen den abt ende tcovent voregh_ de helecht van vyf zillen beemds luttel min ochte luttel meer , die leeght bi Zighene in eer stat heit Ten Worpe , welc beemd es zabts ende scovints eighen + goet , die Lambrecht tieghen hen becreegh alse voregheseeght es , op viere scellinghe goeder ouder coninx grote van + der munten van Vrancrike , sjaers erfs tsijs , in tween tiden sjaers alse dene helecht te sinte Jans + misse ende dander helecht te kersavonde den voregh_ abtde ende covinte van + den voregh_ Lambrechte ende sinen nacomelinghen jaerleex ummermeer te gheldene ; ende want wy ghenen properen zighel en hebben noch zighele , so heeft en besceden man her Heinric van Lovene , persoen van Dyeste , want wy ons met sinen zighele in gheliken zaken pleghen te behelpene , sine zighel om onser beden wille , ane desen brief ghehanghen . Int jaer ons Heren &mring; ccc˚ ende zess + en + dertech , twintech daghe in Augusto .