Corpus Van Reenen-Mulder (CRM14): Oorkonde P565r30501

Allen den ghene_ die dese lettren selen sien ende horen lesen Wi scepene_ va_ Oppenghem Salut en_ kinnesse der Warheit Wi doen cont allen den ghene_ die nu sijn ende na ons come_ selen dat quame_ vore ons ende vore den rechtere jan van den zipe en_ jan sijn sone / ende de selue jan van den zipe droech op sinen sone janne sine lijftocht die hi houdende was van een buenre bemds dat gheleghen es in stocbroech in de prochie va_ Oppenghe_ bi maninghen Srechters en_ bi onsen wijsdomme Ende alse dit ghedaen was so quam de vore~gheseide jan / jans sone van den zipe voreghenoemt en_ droech op in gherechten Erue dat vore~ghenoemde buenre bemds lettel men ochte meer ins rechters hant bi maninghen Srechters en_ bi onsen wijsdo_me Ende alse dit ghesciet was doe gaf de rechtere dit vore~gheseide bunre bemds lettel men ochte meer in gherechten Erue heinrecke van nosseghem dien men heit van kerchoue op viere penninghe cheis iaerlix te gheuene te kersauonde ten vckelschen rechte Ende die te gheuene enen Edelen ma_ min here Godeuerde Graue va_ vyane_ ende here van Grimberghen Ende alse dit ghedaen was so quam de vore~gheseide heinrec van kerchoue en_ gaf dit vore~gheseide buenre bemds lettel men ochte meer den vore~gheseiden janne jans sone van den zipe in gherechten Erue op drie pond cheis iaerlix te gheuene en_ te geldene den vore~gheseiden heinrecke va_ kerchoue ende sinen oer tusschen kersauond ende derttiendach en_ altoes alse selc paiment alse op dien dach in borsen gaen sal Ende in maniere_ ware dat sake dat men heinrecke van kerchoue voreghenoemt en_ sinen oer niet en ghoude ten daghe die hier vore ghenoemt es ochte dats iet ghebrake s? mochten + se hare hant slaen ane tvoreghenoemde buenre bemds en_ dat houden en_ hebben ende de vrome der ane heffen sonder Enech weder~segghen / Ende wat coste en_ wat scaden dat men daer o_me hadde die moeste men den voregheseiden heinrecke en_ sinen oer gelden ende al den achterstellighen cheis eer de vore~gheseide jan jans sone van den zipe ochte sijn oer weder der toe mochte comen Ende al dat ?ier vore bescreuen es dat es ghesciet met wette en_ met vonnesse bi maninghen Srechters en_ met onsen wijsdomme Ende o_me~dat wi willen dat dit vast sal siin / ghestade / ende wel ghehouden So hebbe wi scepenen va_ Oppenghe_ voregheseit onsen ghemeinen seghel ane dese lettre ghehanghen Dit was ghedaen int jaer ons heren doe men screef dusentech drie hondert ende viue in sente steuens daghe