Corpus Van Reenen-Mulder (CRM14): Oorkonde P565r31101

Wj scepene_ van boedeghe_ maken cont al den ghene_ die dese lett_en selen sien ochte horen . dat q_m vor ons willem haerman en_ drouch op de_ meier in de hant drie pont siaers erflec en_ gheliic dat hise vercreech jeghen jan hielen van boedenghem en_ onderfde hem de vorgheseide willem haerman van die_ vorgheseiden drien ponden siaers erflec te heinrecs behouf van boutsfort alse sterflec laet ter capelrien behouf te sente jans in de kerke bi mani_ghe_ smeiers en_ bi wiisdome der scepene_ en_ alsoe alse recht was . daer na q_m die selue meier en_ erfde den vorgheseide_ heinrecke van boutsfort + in die vorghenoemde drie pont siaers erflec en_ alse sterflec laet ter capelrien behouf te sente jans in de kerke bi mani_ghen smeiers en_ bi wiisdome der scepene_ en_ alsoe alse recht was en_ omme~dat dit waer was en_ dit aldos vor ons ghesciede vast en_ ghesteede bliuen sal soe hebbe wi vorgheseide scepene_ dese lett_en gheseghelt met onsen ghemeine_ segle . dese lett_en ware_ ghegheuen int jaer ons heere_ alse men screef dusentech drie hondert en_ tiene in ingaenden meerte - -