Corpus Van Reenen-Mulder (CRM14): Oorkonde P588r34301

Wi her Jan van Ymmersele hebben ghecocht jeghen her Lodewike van Leefdale tgoet dat te Duffele leecht , ghelikerwys dat myn here syn vader vercreech ent her Lodewyc syn sone houdende es , met al dien rechte datter her Lodewyc toe heeft sonder eneghe malysie , omme hondert pont ouder grote ende tsestich pont ouder grote , den guldenen penninc die men heet scilt des keysers ochte tsconincs van Vranckerike vore sesthiene grote ende enen halven , blivens her Lodewike . Vort es ghesproken in die comenscap , dat alle die rente ende al die cheins in corne ende in ghelde , ende in ghevalle ende in heerlecheiden ende in allen saken her Lodewike volghen selen tote op den dach dat hiere hem ghenoech af doet ; ende vort soe es daer een bosch dat Claes van + den Bossche ghecocht heeft dat men nu hout ende houwen sal binnen desen blec tide , gheliker wys dat syn vorwaerden syn dat men hem die houden sal ; vort es te wetene dat daer es vercocht een eyke die leecht int hof Ter Steppen , ghevelt gheliker wys dat si daer leecht sal + si volghen ende twee albome meden die staen int hof Ter Elst , vore die scuere , die selen volghen her Lodewike vore~ghenoemt . In kinnessen der waerheit dat wi willen dat dese vorwaerden bliven vaste ende ghestade gehouden , so hebben wi her Jan van Ymmersele dese letteren beseghelt met onsen seghele ?hanghende . Ghedaen int jaer ons Heren als + men screef dusentech drie + hondert twee ende veertech ?chte daghe na derthien~dach .