Corpus Van Reenen-Mulder (CRM14): Oorkonde P588r34302

Allen den ghenen die dese letteren selen sien ochte horen lesen , Lodewijc van Levedale reddere , saluyt met kinessen der waerheit . Cont si allen lieden dat ic met minen volcommenen wille ende met mire volcommene bedachtecheit , ben commen voer vrouwen Agnesen , vrouwe van Ymherselle , ende voer her Janne , here van Ymherselle alse hare wetteghe voghet ende mombore , ende voer hare man , die hier na ghenoemt ende ghescreven staen , dat es te wetene , Jan van Gheneghem , Jan van Waerloes , Giellis Zaelden , Giellis van Zinthout , ende Arnoudt Davijts , ende hebbe ghekent ende kennen dat ic hebbe vercocht wel ende wettechlike in tytele van wetteghen vercopene , Phylipse van Pollanen , wilen was her Jans sone van Pollanen sredders , erflec ende ewechlec al + selc goet , erve ende renten ende toecomsten in naten en in droghen alse ic hadde ligghende binnen der prochien van Duffle , met alle den rechte dat daer + toe hoert gheheellec ende al in allen manieren alst voerseide goet ende erve gheleghen es , ghelijc dat ict houdende was ghelyc te leene van der vrouwen van Ymherselle voerghenoemt , ende ghelyc dat mijn here mijn her Rogier van Levedale mijn vader , daer Goet de ziele af hebben moete , hier vormaels cochte ende vercreegh ieghen Arnoude Tayen ende joncfrouwe Lysebetthen van Sotteghem sinen wiven ; int welke goet Willem Nose van Antwerpe gheerft ende ghedaen was voer hof ende voer here alsoe daer + toe hoerde , dwelke goet voerghenoemt gheheellec ende al ic hebbe vertoghen ende vertyen erflec ende ewechlec te des voerseits Phylips behoef van Pollanen ; ende kinne dat mi de vorseide Phylips dit vorseide goet wel ende wettechlike betaelt ende volgouden heeft met ghereden penninghen , ende hebben gheloeft den voerseiden Phylipse van Pollanen ende sinen erfghenamen van desen voerghenoemden goede op mi ende op tmine gherechte waerscap jaer ende dach ende hier + toe es ghesciet alle dat dattere sculdech was toe te ghesciene metten rechten bi maninghen van der vrouwen van Ymherselle ende des heren van Ymherselle alse hare wetteghe voghet ende mombore voerghenoemt , ende bi wijsdoeme haerre manne voerseit , negheen point van rechte achte~ghelaten . In kinnessen der waerheit hebbic Lodewijc van Levedale reddere voerghenoemt dese letteren gheseghelt met minen seghele . Ende omme de meerre sekerheit den voerseiden Phylipse ende sinen erfghenamen te doene van allen desen voerseiden dinghen , soe biddic ende versoecke der vrouwen ende den here van Ymherselle ende haren mannen voerghenoemt , dat si kinnen dat alle dese voerseide dinghe aldus voer hen ghesciet ende ghedaen sijn , ghelijc dat hier voren ghescreven staet , ende dat si hare seghele hanghen ane dese letteren met minen voerseiden seghele , ende dat si daer toe seghelen met haren seghelen alle de andere brieve die op dese voerseide dinghe ende vorewaerden ghemaect ende ghescreven syn in kinnessen der waerheit . Ende wi Agnese , vrouwe van Ymherselle , Jan here van Ymherselle alse hare voghet ende mombore , Jan van Gheneghem , Jan van Waerloes , Gieliis Zaelden , Giellis van Zinthout ende Arnoudt Davijts , hare man voerghenoemt , overmids bede ende versoecken her Lodewijcs van Levedale voerseit , soe kinnen wi ende orconden dat alle dese voerseide dinghe ende vorewaerden aldus wettechlec voer ons ghesciet ende ghedaen sijn ghelijc dat hier voren ghescreven staet , ende hebben onse seghele ghehanghen ane dese letteren met sinen voerseiden seghele , ende selen voert seghelen met onsen seghelen allen de andere letteren die op deze voerseide dinghe ende vorewaerden ghemaect ende ghescreven sijn , in kinnessen der waerheit . Dit was ghedaen int jaer ons Heren als + men screef dusentech drie + hondert twee ende vertech , des maendaghes na sente Valentijns daghe in de maent van Sporkille .