Corpus Van Reenen-Mulder (CRM14): Oorkonde P588r34303

Wi Agnese , vrouwe van Ymhersele , ende Jhan , here van Ymhersele , alse haer witteghe monboer , riddere , maken cont ende kenlec allen luden , dat voer ons comen is ende in onse hof , her Lodewijch van Levedale , riddere met sinen vryen wille , ende heeft met handen op~ghedraghen Willem Noezen , portere tAntwerpen , allen den gheboeden alse en recht wyst , daer op in der kerken tierst ghedaen volcoemelec met onsen volcoemenen wille ende consent ende met maenissen van ons ende met wysdoemen Jhans van Gheneghem , Jhans van Waerloes , Gillis Zaelden , Gillis van Sinthout ende Arnt Davijts , onser manne daer toe ende over gheroepen ende ghebeden , erflec alsulc goet , erve ende renten alse her Lodewych voerseid ligghende hadde te Duffle ende van ons houdende was te leene ; met allen den rechte dat daer toe behoert gheheelec ende al ende in allen manieren alst voerseyde goet ende erve gheleghen is , est in droghen , in naten , in harden , in weken ; voert soe heeft het Lodewijch voerghenoemt des voerseyden goets erfs ende renten teweliken daghen verteghen ende al des rechts dat hi daer in hadde ocht hebben mochte alse te Willems behoef voerseyd och des gheens diet van Willem voert ver? (;) ?ec soe heeft het Lodewijch voers_ den voerghenoemden Willem hier af gheloeft gherechte , waerscap te doen jaer ende dach , ende want dese voers_ ? ende voerwaerden sijn gelikelec alse voerscreven sijn , met onsen wille ende consent in onse hof voer ons ende voer onse manne voerghenoemt met allen rechte datter toe behoerde ende en~gheen poynte van recht achterghelaten , gheschiet ende vast ende ghestade bliven selen , soe hebben wi overmids bede ende versuec heren Lodewijcs voerseyd desen brief bezeghelt met onsen zeghelen . Ende wi Jhan van Gheneghem , Jhan van Waerloes , Gillis Zaelden , Gillis van Sinthout ende Arnt Davijts , manne mire vrouwen van Ymhersele voerghenoemt , kennen ende tughen met haer ende met heren Jhanne haren witteghen monboer voerseyd , dat alle voerscreven zaken voer hem ende in haer hof ende voer ons gheschiet sijn met allen den rechte datter toe behoerden ende en~gheen punte van rechte achter + ghelaten ; ende hebben onse zeghelen met haren voerseyden zeghelen , altesamen an desen brief ghehanghen overmids bede ende versuec heren Lodewijcs voerseyd in kennissen der waerheit . Ende waer dat sake dat an desen brief enigh van den voerseiden zeghelen ghebrake och met onghevalle te~broeken worde , nochtan selen alle voerscreven voerwaerden bliven in haerre volcoemenre macht . Ghegheven int jaer ons Heren doe men screef duzent drie + hondert viertich ende twee , des manendaechs na sinte Valentijns dach .