Corpus Van Reenen-Mulder (CRM14): Oorkonde P588r34304

Wii Agneise , vrouwe van Ymmersele , ende Jan van Ymmersele , ridder , hore wittachteghe monboer , maken cond allen lude dat vor ons comen is Willem Noese , ende heeft ons op~ghedraghen in onsen handen tot Phylips boef van Pollanen , dat goed te Duffle alste groet ende alste cleine alst wilen was heren Lodewiics van Levedale , heren Rogiers sone van Levedale , welc goed wi voirt verliit hebben ende verlien vor ons ende onse nacomelinghen Phylips van Pollanen ende sinen nacomelinghen van ons te houden ten rechten erflein ; in welke goed dat Phylips van Pollanen voirscreven inghecomen ende inghevest is bi onser maninghe ende na wiisdame onser mannen dier van rechte sculdech waren op te wisen , ende in desen saken voirscreven en~gheen punte van rechte after ghelaten , dat Phylips van Pollanen voirscreven end sinen nacomelinghen eneghe onstade doen mochte . In orconde desen brieve bezeghelt met onsen seghelen , ende omme die meerder sekerheide hebben wi ghebeden onsen mannen heren Janne van Liere riddere , Janne van Ghenneghem ende Gheerit Martiins , dat si desen brief met ons bezeghelen in kennissen . Ende wi Jan van Liere ridder , Jan van Ghenneghem ende Gheerit Mertiins , omme beden willen onser liever vrouwen van Ymmersele ende heren Janne van Ymmersele ridder , horen wittachteghen monboer , hebben wi desen brief met hem bezeghelt , in kennissen der wairheit . Ghegheven int jaer ons Heren dusent drie hondert drie en viertech , swoensdaechs na beloken Paeschen .