Corpus Van Reenen-Mulder (CRM14): Oorkonde P678r38601

Wir . . Scouthit / ind wir . Scheepenne / vns lieven geminden heren heren . . heinrics here van dyepenbeke / ind . . Erfvaecht te ludicke / in + der banck van bruestheim / doen kunt allen luden die desen brief soelen sien of horen lesen / dat der voerscreve_ vnse lieve geminde h_e van Dyepenbeke . . Erfvaecht te ludicke / ind half here van bruestheim / selve / lijflic / voer vns koemen is in + der vurs_ banck van Bruestheim / vns openbaerlic kunt doende / oevermitz / ind mit eyne_ oepenen brieve / des dorluchtighen mechtighen heren / ind v˚rsten / h_en willems . . hertogen van guilge / ind van Gelre / besiegelt / mit aenhangenden sieghelen / vns genedigen heren des . . hertogen van guilge / ind van gelre vurs_ / ind sijnre getruwer manne / dat is te weten / h_en heinrichs van huchelove_ Scoutheten van Eschwilre / ind h_en wynants van Rore ritter / Wilgen brief / wir aensiende / gehoert hebben lesen / inhaldende / ind begripende cleirlich / dat vnse genedige here / der . . hertoge van guilge / ind van Gelre sijne g˚ede gunst bewiest heeft / vnsen lieven / here van dyepenbeke vurs_ / ind heeft den bosch geheiten der bosch van guilge / haudende / Achteen boenre . vierteen groot r˚eden / ind . Sesse cleyne r˚eden / luttel meer of myn / gelegen / ind gehorende in der heirlicheit van Bruestheim / die der vurs_ vnse lieve geminde here van dyepenbeke / van vnsen genedigen h_e / der . . hertoge van guilge / in leen haudende was / vri / los / ind leedich te laetg˚ede gemaect in oerber / ind in name / des ordens van + den duetschen + h˚se / ind sunderlingen des h˚ys van Bernsheim . . waer o_me / vnse lieve h_e van dyepenbeke vurscreven / den bosch voerghenoempt van vns . . Scouthit ind . . Scheepennen vurs_ / voer laetg˚yt ontfangen heeft met rechten manissen / ind vonnissen vnser banck recht van Bruestheim Jnd heeft den selven bosch / die also te laetg˚yde gemaect is / in rechter wetteliker coumanschap vercocht den eirsamen geysteliken luden / h_en Reynarde van h˚sen . . lantcom_endure der Balien van den byessen / ind h_en heinrich van haevert . . Com_endure / ind in name des h˚ys van bernsheim vurs_ / om_e eyne gewisse Sum_e van gelde / wilge Sum_e gelts die vurs_ . . lantcommend˚r / ind . . Com_end˚r / den vurs_ vnsen h_e van dyepenbeke / wael / ind volcoemelich betaelt hebben / gelijc / dat hij ouch v˚r vns bekant ind ghelijdt heeft also / dat hoem wael ghen˚echt / Oev_mits wilge ghen˚echde / ind betalincghe / vnse h_e van dyepenbeke den vurs_ bosch / voer vns opgedraegen heeft Jnd daer op / v˚r hoem / sijne erfgenamen / ind naecomelincghe verteeghe_ / mit allen den rechte / dat hij sculdich was te doen / in oerber des h˚ys van Bernsheim / aen vns versuekende / ind biddende / dat wir den vurs_ . . Com_endur tot Bernsheim / in den vurscreven bosch g˚yden wouden / ind daer in setten als v˚r laetg˚yt mit allen den rechte als vnse banck ind Scheependom van Bruestheim te recht stoinde . . Dair om_e / hebben wir aengesien / wie vnse genedige h_e der . . hertoge van guilge / den vurs_ bosch / ghevrijdt heeft sinen wille daer toe gevende / dat + me_ den selve_ bosch / te laetg˚ede gemaect heeft / te ewighen dagen Jnd oech aengesien / die rechte wetlike couma_scap / ind betalincghe / die ghera˚empt ind gheschiedt sin / tusschen vnsen h_e van dyepenbeke / den . . lantco_mendur van Byessen / ind den . . Com_end˚r van Bernsheim vurs_ / oevermits / ind van des boschs wegen geheiten der bosch van guilge vurs_ So hebben wir / den vurs_ h_en heinrich van haevert . . Com_end˚r des h˚ys van Bernsheim / in den vurs_ bosch gheg˚yt / ghericht ind gesat in oerber des h˚ys van Bernsheim mit manisse / ind vonnisse / ind mit allen den rechte / dat vns heren . . scheepe~nhof van dyepenbeke / te Bruestheim te recht steit Jnd en hebben / in der vurs_ g˚edinghen / ghein poent van rechte achter ghelaten / mar alle dat / daer in gedaen / dat wir van rechts wegen sculdich woren te doen Also / dat der vurs_ her heinrich . . Com_endur des h˚ys van Bernsheim / ind Com_endure / die nae hoem sijn soelen van des h˚ys wegen van Bernsheim / den vurs_ bosch / hebben / ind besitten soelen / te eweliken dage_ / te laetg˚yde haudende van vnsen h_e van dyepenbeke / sinen erfgename_ / ind naecomelinghen / om_e twe pen_inghe Lucslachts / die dat vurs_ huys van Bernsheim sculdich sal sin te betalen alle iaer op sente Stevens dach / in vns heren hof van dyepenbeke tot Bruestem / ind gheynre leye recht / noch dienst / meer / en sal dat huys van Bernsheim / van des vurs_ boschs wege_ sculdich sin te doen . . Jnd hier mede / heeft vnse here van dyepenbeke vurs_ / bekant v˚r vns / home / sinen ergename_ / ind naecomelingen / gheynre leye recht meer te hebben / noch te behauden / te ewigen dagen / aen den vurs_ bosch geheiten der bosch van guilge . mar der duetsche orden / ind dat h˚ys van Bernsheim / soelen den vurs_ bosch besitten / hantplichten / ind des ghebr˚ken / rastelic / ind vredelic / te ewighen dagen in hare possessien te bliven / onghehindert daer aen te sijne va_ vnsen h_e van dyepenbeke / sine_ erfgenamen / ind naecomelinge_ vurs_ . Alle argeliste / n˚we vonde / ind behendicheit in allen desen saeken / ind in yegeliker vytgescheiden . . Jnd want alle dese vurs_ saeken / v˚r vns Scouthit ind Scheepenne_ vurs_ / gheschiedt sin / ind vns / die kundich sin / gelijc / ind in allen formen als vurs_ is . . So hebben wir Scouthit ind wir Scheepenne vns lieven geminden heren van dyepenbeke vurs_ / in der banck van Bruestheim / vnsen Siegel des wir gemeynlich / van vns ampts / ind scheependoms wegen gebr˚ken / mit vnser rechten wetentheit in orchonde der woerheide / an desen oepenen brief doen hanghen . . Jnd want vnse lieve h_e van dyepenbeke vurs_ / alle dese vurs_ saeken / voer vns gedaen / ind bekant heeft gelijc / als in desen brief / voerghescreven is / So hebben wir home gebeeden / ind bidden / dat hij sinen Siegel / voer / an desen brief / bij den vnsen / wille doen hanghen . . Jnd wir heinrich here van dyepenbeke . . Erfvaecht te ludick vurs_ / om_e te mer siekerheit ind ghewisheit den duetschen orden / ind den . . Co_mend˚r / in oerber des h˚ys van Bernsheim te doen / ind want wir bekant / ind ghelijdt hebben / v˚r Scouthit / ind Scheepenne_ vurs_ / bekenne_ / ind lyen / oev_mids desen selve_ brief / oepenbairlich / dat alle dese saeken / in desen brief begreepen / gheschiedt sin / gelijc / ind in allen formen / als vurs_ is . So hebben wir / voer / vns / vnse erfgenamen ind naecomelinge / . vnsen p_pren siegel / in orchonde der woerheide / ind in ewiger stedicheide / ind om_e versueck vnser Scouthit / ind Scheepennen vurs_ voer / aen desen tgegenwordigen brief / met vnser rechter wetentheit doen hanghen . . Gegeven in den jaer vns heren D˚sent / + dri + hondert Achtentich ind Sesse . noeghenteen dage in Augusto . .