Corpus Van Reenen-Mulder (CRM14): Oorkonde Q002p39001

Allen dien~ghenen die desen brief sien solen of horen lesen scoutet ende scepenen van bennen der stad van hasselt kennisse der waerheyt met groeten want te voertiden voer ons comen siin jn p_p__en persoenen arnout wilnee vanden~driessche scepen van buten was der stad voerscreven ende peter sraets als testamentore arnouts testaments of lesten willen wilnee tolleners ende hebben een testament ghepruyft des~selfs arnouts wilnee tolleners jn welighen testamente hi hadde hoem behauden macht af ende toe te doene hier om doen wi te wetene allen luden dat voer ons comen es jn p_peren persoene peter sraets voerscreven nae doet arnouts wilnee vanden~driessche voerscreven ende heet voer ons ghepruyft enen aenhanc dien arnout wilnee tollen_e van machte siins testaments voerscreven den~selven testamente toe~dede welighen aenhanc ende toedoen peter sraets voerscreven voer ons bewiist heet met arnoude van bruysthem ende met margrieten der auder meesterssen van zepperen jn deser manieren onderscreven arnout van bruysthe_ ghethughe gesworen op dien aenhanc ende toedoen voerscreven seet op sinen eet dat hi in arnouts lesten wille daer bi ende aen was dat hi seder niet en leefde deerden + halven dach dat arnout tollen_e wilnee voerscreven besatte sinen testamentore peter raets allen sine erflike goede om gode te ghevene doen vraeghde hoem peter raets arnout of ons yman bedencde wie souden wi dan doen doen sede arnout wilnee voerscreven met ouwerden heb ich te luttel goets bedenct vch yman weert vch met minen erve ende vercoepet alsoe verre als ghiis noet hebt ende dat vch dan over~bliift dat gheet den ermen ende seet dat dit siin leste testament was margriete die aude meestersse van zepperen gheenghe ghesworen seet op horen eet gheliic arnout voerscreven ghetuycht heet over~al ellic sunderlinghen ghehoert ende examineert Jn orkonde der waerheyt hebben wi onsen ghemeynen sighel ons scepens~stoels aen desen brief doen hanghen ghegheven jn + den jaere ons h_en dusentich dri + hondertich ende neghentich vier daghe in novembri