Corpus Van Reenen-Mulder (CRM14): Oorkonde Q013p37501

Wir dyric quant Scouteite en_ leen~ma_ne des hoefs va_ vdecove_ t˚~hoere_de onse_ lieve_ gheminde_ h_e h_en joha_ va_ lyeve_dael den abt van sint cornelis / dats te wete_ Arnout marsilis soen van vdecove_ dyric groettrutte_ Arnout Kupe_bend__ joh_es mees scriner te triecht johan_es r˚mpheym . en_ willike_ gorijs soen van vdecove_ . doen cont allen luyde_ met dise_ tieghe_werdige brieve beke_ne_de ope_beerlich en_ tuyge_ dat vor ons come_ sijn als vor Scouteit en_ leen~ma_ne des hoefs ons lieve_ h_en des abts vorsc_ . heinric va_ heppenart knaep te wopene_ ope_beerlike bekant heeft dat hi wetlike verkocht heeft eyne_ eersame_ ma_ne wynand va_ hese roetsman en_ poert_ d_ stat van tricht en_ sine_ gherve_ . veertyene boenre acker lants of dar omtrent en_ twintich schillinghe auder groet neghen pe_ninge en_ twellefe cap˚yn erflik_ en_ joerlik_ rente_ . Also die vorsc_ heinric dat vorg_ lant en_ die onderpande derre twintich schillinge aud_ groet noeghen pe_ninge en_ twelleve capuyn / den vorsc_ wynand bewijst heeft / willich lant en_ erflik_ rente_ vorsc_ ongedeylt also dat gelegen is leeng˚et is ons liefs h_en des abts vorsc_ eyns deyls / En_ ongedeilt loetg˚et is des edelen vrome_ eersome_ ma_s h_en Arbouts h_e te steyne ritters eyns deyls . en_ hove_de is ongedeylt te vdecove_ in de_ hoeve_ derre h_en vorsc_ met allen den rechte en_ maniere_ / also wir Scouteit en_ leen~ma_ne des hoefs van vdecove_ halden en_ ons k˚ndich is . Dats te wete_ om eyn seker so_me gels / die die vorsc_ wynand dene_ vorg_ heinric volcomelic betaelt en_ genoech gedaen heeft . also die selve heinrich dat voer ons bekande . willich lant en_ twintich scillinge aud_ groet no˚eghen pe_ninge en_ twelleve cap˚yn met de_ ond_pande vorsc_ . die daer toe behoerende is / die vorsc_ heinric van heppenart op~droech mit monde en_ mit halme in hant dyrics scouteite_ vorsc_ en_ ghyenc vyt en_ verteych des ov_mits ons leen~ma_ne vorg_ in orber wynands en_ sijnre erve_ vorsc_ . also verre als onsen lieve_ h_e den abt vorsc_ dat aen sine_ leen r˚erende was / en_ die vorsc_ dyric verleende de_ vorsc_ wynand in orber des selve_ wynands en_ sijnre erve_ / dat vorsc_ go˚et mit gevolgenis ons ma_nen vorsc_ mit des hoefs recht als dat gewoenlic en_ behoerlic is / beheltenis eyn jgelic sijns rechs . Die willike twintich scillinge auder groet no˚eghe_ pe_ninge en_ twelleve capuyn erflik_ en_ joerlik_ rente_ vorsc_ mit de_ pacht des vorsc_ lants alle joer te betale_ sijn op sint Andries daech des heylige_ apostels . wynand en_ sine_ erve_ vorsc_ . alst recht en_ gewoenlic is alle joer inde_ hoef te vdecove_ vorg_ / gelikerwijs als heinr_ vorsc_ die te halden te hebben en_ te heffene plach . mit verbe_tenis des onderpants die vorde_ vorsc_ cee_s en_ cap˚ne_ verbonde_ is in ald_ voege_ en_ recht . als ons Scouteit en_ leen~ma_ne vorsc_ dat k˚ndich is en_ den Scouteit scepene_ en_ loete_ des h_en va_ steyne vorsc_ . Van wilken g˚ede die selve wynand leen~man waert ons lieve_ h_en des abts vorsc_ . alsoe dat recht en_ gewoende is des hoefs vorg_ En_ geloefde die vorsc_ heinric van heppenart den vorsc_ wynand en_ sine_ erve_ weringe te doen vast en_ vredelic te halde_ in allen dene_ vorg_ g˚ede joer en_ daech en_ alle recht aensproeke aef te doen als dat gewoenlic is / in goeden trouwen / en_ sijn moeder en_ z˚st_e doen te vertyen alle des goets vorsc_ in orber des vorsc_ wynands en_ sijnre erve_ . en_ alsoe ons dat recht en_ bescheit doecht sijn . En_ om~dat wir leen~ma_ne ons liefs h_en des abts van sint cornelis vorsc_ ons p_pre_ siegelen niet bi ons en hebben . soe erkiese wir en_ bidden dyric quant / den Scouteit ons h_en des abts vorsc_ . dat hi sine_ siegel voer ons als voer hoem aen diesen opene_ brief wil hange_ . Dat ich dyric vorsc_ om bede_ wille der partien en_ derre leen~ma_ne mijns liefs h_en des abts vorsc_ gedaen hebbe Jn get˚echgenisse en_ ke_nisse der woerheit alle der p˚nte_ v˚rwarde_ en_ saken vorsc_ . alle argeliste vytgescheiden . . . Gegeve_ jnt joer ons h_en d˚sent drie + hond_t vijf en_ tseve_tich op sinte gondolf en_ mondolf daech der heylig_ b˚sscope_ . des moents vande_ hoymoent des zestyende dachs te latine_ gheheiten Julius