Corpus Van Reenen-Mulder (CRM14): Oorkonde Q013p37502

. . Wir diric quant scoutet en_ leenman des hoefs van vdencoven . toebehorende den eirwerdighen in gode vader en_ onsen here h_en joha_ne van lievendail abt van S_ Cornelis . Arnout marsilis son van vdencoven / diric groetrutten arnout c˚penbender . joh_es mees scriner te tricht / joh_es van rompem / en_ willem goris son van vdencoven leenman des hoefs voers_ . doen cont allen luden die desen brief solen sien of horen lesen en_ kennen openbeirlic dat voer ons als scoltet en_ leen~man voers_ . comen en_ verscenen is . eyne eirsame besceiden joffrouwe . joffr_ j˚tte walne wynants dochter was van houthem als gherve en_ neeste moigh henrics van heppenart knaep te wopenen en_ heet bescodt gheloist en_ ghequidt alsollich lant . penninghe ghelt / cap˚ne en_ joerrenten die wynant van hese roitsman te tricht ercregen en_ ghegolden hadde tiegen henric voers_ . en_ van wilgen guede altemoil gewaich is ghedaen in + den brieven do deys tiegenwerdich brief is doir gesteken / en_ dar om so hebbe wir scoltet en_ leenman voers_ die voers_ joffr_ na alle den recht alst gewoenlic is jn + den voers_ g˚ede altemoil en_ do wynant tiegenwerdich was en_ kande dat home van synen gelde gnoech gedaen were gheg˚et in orber hoirs en_ hoirre gherven . en_ want wir leenman voers_ eghein siegel en hebben so hebbe wir ghebeden diric quant scoltet ons lieven heren voers_ . dat he sijn siegel voer hoem en_ voer ons an desen brief wille hangen in get˚ichenis der woirheit . en_ ich diric quant voers_ om_e beden wille der leenman voerg_ so heb ich voer hon en_ voer mich mijn p_per siegel an desen brief gehangen Gegeven jn + den jore ons h_en . d˚sent drie + hondert . + tseventich en_ vive . des and_en daghe_ na sent kath_inen daich .