Corpus Van Reenen-Mulder (CRM14): Oorkonde Q071p36001

Wij henric here van dyepenbeke doen te wetene enygewelken dat om den dancbergen dienst die een eersam man onsen geminden leenman wilhem proest scepen va_ ludic heeft ons gedaen / ende die wij hopen van hem en_ sinen gerven te hebbene in tiden toecomende / wij hebben gegeven en_ geven met desen tieghenwordigen l_ren te houdene van ons van onsen oir en_ nacomelingen hem sinen oire en_ nacomelingen ene sek_ som_e van twintich al ouder guldenen des scilts van vrancrike of van almaengen / in leene en_ in manscape van jaerliken en_ erfeliken rinten te betalene van onsen wegen onsen oire en_ nacomelingen / den selven willem_e sinen oire en_ nacomelingen / alle ja_e erfelec en_ tewegen dagen / te desen t_mine / dats te wetene . deen helicht / opten dach der geboirten van sint Johan bapt_ en_ dander helicht opten dach der geboirten ons h_en ihesu Christi . de welke twintich oud_ scilde voir_ / wij om te doene den selven willem_e meerd_e sekernisse van sinen vors_ paymi_te te hebbene / alle ja_e en_ erfelec ten dagen boveng_ / bewisen te nemene te heffene en_ te hebbene aene alle de vrochten rinten rechten p_fiten en_ opcomelingen van onser molen die + men seet gemeynlec die molen van der capitelen die wij hebben houden en_ besitten in onse_ dorpe en_ gerichten van dyepenbeke / die welke goede alle rinten p_fijt en_ opcomelingen van + d_ vors_ molen / wij van sek_en weten_ hebben verobligeert ane den selven willem_e oppenbaerlec op alsulke maniere vormen en_ conditien weert dat gebreke / dat niet gevallen en moet / dat wij ons oire en_ nacomelingen worden vonden in gebreke in tiden toecomende wel en_ gheheellec te betalene den selven willem_e / sinen oire en_ nacomelingen / van + d_ vors_ rinten ten dagen en_ t_minen boveng_ ware in al of in deele / alsulc gebrec / dats te wetene tgebrec van betalingen van sint jans messe tot sinte peters daghe inganc oeghst daer nae vloechs volgende ende tgebrec der betalingen van kersmessen tot ons_ vrouwen dage purificatie daer nae te~hans volgende in wat ja_e dat ware / dat altehans den dach van sinte peters inganc oeghst / van + den paymi_te van sint jans + messe / of de feeste van ons_ vrouwen dach purificatie van + den gebreke van kersmesse leden . de selve willem siin oir en_ nacomelingen mach en_ selen mogen toecomen en_ die hande slaen aen alle de vors_ molen ende ane alle p_fijt rinten en_ opcomelingen daer af te nemene / heffene / houdene en_ te antveerden sond_ weder~seggen tot dier tijt dat wij / ons oir en_ nacomelinge heme selen gheheellec genoech gedaen hebben van sinen vors_ paymi_ten en_ van allen achterstelle wa_e dat sake dat des mich wa_e Dit oec aengehangen waert dat sake dat geviele bij engen ongevalle onse vors_ molen alsoe ghedestrueert of belast worde / of en gulde niet alsoe vele / dat der selve willem niet hebben en mochte siin voirg_ rinte / wij selen dat gehouden siin eldere te bewisene suffisantelec / alsoe vollec als wij des versocht selen worden / van welke_ twintich oud_ scilden de vors_ willem heeft ons hulde en_ manscap gedaen met hande en_ met monde nae wijsdom_e van ons_ manne / Met alsulk_ conditien noch aengehangen dat wij . ons oir en_ nacomelingen selen mogen aen den selven willem_e / sinen oire en_ nacomelingen alle de vors_ rinte afquiten en_ afleggen alsoe decke als wij . willen met eenre sek_en som_e van drien + hond_t ouder gulden_ des scilts alsulcs als boven vercleert staen te betalene eenwerven / die welke som_e van gulden_ sal sculdich bekeert te sine in anderen erfeliken vryen eygen goede / de welke de selve willem houden sal hi . sijn . oir en_ nacomelingen . van ons . onsen oir en_ nacomelingen te leene en_ te manscape / Ende alle de dingen bovengenoempt hebben wij de vors_ henric geseet en_ openbaerlijc bekint vo_e onse scepen_ van dyepenbeke boveng_ / ende willen . dat onse vors_ molen verbonden sij in + der manieren . boveng_ / Ende overmits dien dat dit seker dingen bliven en_ gestentich soe hebben wij aen desen tiegenwordigen l_ren onsen p_pren segel gehangen in teken der waerheit Gesciet en_ gegeven jnt jair van + d_ geboirten ons h_en dusent dre + hond_t en_ tsestich . xiiij dage in meye .