Corpus Van Reenen-Mulder (CRM14): Oorkonde Q088a36701

Wir johan here van Pytersheim doen kont allen luden die dese lett_en sien solen of horen lesen / dat want vurtiets besceiden lude / en_ eersame die Abdisse / ende dat Convent des Cloester van hoecht / aen die eyne p_rtie / en_ wilne gerat van Oys en_ arnot sin alste soen van der anderre p_tien / van allen gedinge / stote / ende tveste / die tusschen hoen geweist hebben in einger maniren als van den bossche geheiten op ghine Spoert die gelegen is tusschen grymbede / en_ megglen / en_ van den Eymoelre Br˚eke gelegen te Grymbede achter den wyer ons geloecht / ende sich aen ons verbonden hebben / ende geloeft vaste / en_ stede ewelike en_ ommerme te + halden / ende te voldoen soe wat wir no der konden en_ der woerheit tusschen die partien secghen solden / et were ten rechte / of ter minnen / En_ want ons die p_tien ernstlich gebeden hebben dat wir wolden dar op die konde / en_ woerheit horen / en_ alsulke tveste / ende gedinge vurs_ nederleggen / ende soten / hir om ijst dat wir als gemeine vrunt in beiden syden / om beede_ wille bey~der p_tien / der~wilger gedinghe / stote / ende tveyste wir node nemen / dit secgen / en_ beclerennis aen ons genomen hebbe_ ende dar om die woerheit / konde / ende clerennis der alster / ende ouch anderre besceidenre lude die van der p_tien Rechte te secgen weissten hebben gehoert / en_ ons wale mit wisen en_ besceiden luden beroden / ende onse segghen gesacht hebben tusschen dis p_tien ende secghen overmits dese letteren in alle der maniren / en_ formen gelike dat hi no volgt . Jn den eirste is onse secghen dat die Abdisse / ende Convent des Cloesters van hoecht vurscreven erflich en_ ommerme den bossche van Spoert vurg_ soe wie die gelegen is hebben solen / ende behalden / al tot hore alder pelingen tuwe / di ons die abdisse mit horen eyde bewijst hebt ende wale becleirt / wilge alde pelinge die abdisse / ende dat Co_vent van hoecht vurscreve_ n˚ van nuwents overmits Richt_ ende Scepenen van Megglen hebben doen steynen / ende pelen Voert is onse secghen / dat die abdisse / en_ Convent van hoecht vurg_ ewelich / ende ommerme hebben solen / ende behalden / gans / ende temole dat bruke van Eymole vurg_ . al + tot heren coelsoeps stertken tuwe / willich stertken gelegen is tusschen den molen~wyer / ende den waghen~weych die teweirs doer dat bruke geit / willic onse secghen vurscreven die abdisse / ende Convent / ende arnot wilne gerats soen van oys vurscreve_ dar in der tgegenwordicheit stecghenden / ende vaste / ende stede oenverbrocht geloefden te halden ewelic / ende ommerme . hir over en_ aen hebben geweist eersame / ende berve lude / her johan van haren Sengher der kirken van sente Servose te Triecht / willem van Pytersheim ons br˚eder Canu_nic der selver kirken / her librecht voeght van horrion Ridder / dideric van haren onse neve Reyner van Eymole / johan van Noderbruke Otte van Rennenbergh / willem Cane van Pytersheim / ende heinric van megglen Scoitith / ende die Scepenen van megglen gemeinlich getugen dar tu van beyden p_tien geheist / en_ sonderlinge_ gebeden jn getugenis der woerheit soe hebben wir johan here van Pytersheim vurscreven desen letteren onsen p_per segel aen~gehange_ Gegeven in den jore van der geboerdt ons heren dusent drie + hondert Syven ende Sestich / des vridachs no sente jocobs dach En_ want wir johan van hare_ senger / willem van Pitersheim / librecht voeght van horrion / en_ dideric va_ hare_ vurs_ ov_ dit secghen geweyst hebben / en_ dat gehoert / en_ gesien / soe hebben wir om temere steitgeit / en_ geloyve desen lett_en onse p_per segele / bi dat segel des h_en van Pytersheim vurg_ aengehange_ / Gegeve_ in den jore en_ op den dach v˚rs_