Corpus Van Reenen-Mulder (CRM14): Oorkonde Q155p39601

?ijr gilijs heze Scoutet . wilhem van vriheerne . jan van Lichtvelt Peter Horremort / wilhem Cleynne_ / van hoessilt / jan jacobs Godevart van werme / ende jan swogher Scepene_ eens moghentichs en_ wijs heren her Henrics Marcheal here_ van Nuvilgen in Condros en_ van werme ridders in + den dorpe van werme groete in onsen here / met ken_isse der waerheit Cont sijn in jghelic / die desen opene_ brief solen sien oft hore_ lesen / dat voer ons als voer hof ende gherichte doer me_ die goede af helt hier na becleert her Henric Marcheal ons here vorg_ op die een zide / en_ meester Gheret van heere Canonic van onser vrouwe_ keercke_ van Tongren sich partie makende en_ versuecke_de van sijnre here_ weghe_ des deeke_s en_ der Capitule_ onser vrouwe_ keercke_ van Tongren vorsc_ op die ander zide / lijflec en_ in p_pere_ p_sonen come_ / en_ hun verschene_ . der vorg_ her Henric cande en_ lide voer ons / dat hi te voerdaghe_ van + de_ Deeke_ en_ Capitulen van Tongren vorsc_ in erfve ghenomen hedde mit zekere_ vorwerde_ hoere_ hof van Hardelinghe mit allen den lande / bempde Eusele bossche Ceyse Capune_ hinne_ hoeghe en_ neder gherichte_ toe~hoere_de den vorg_ heren en_ hoere_ hoefve vorsc_ o_me ene zekere So_me van Corne ghelde Capune en_ hinne_ allen jare tot To_gren te zekere_ termine_ den vorg_ here_ te betalen en_ te levere_ / Ende voer die vorsc_ So_me_ en_ allen die vorwoerden die tusschen h˚n ghevorwert were_ te voldoen / en_ ewelich te halde_ / soe hedde hi den vorg_ deeke_ en_ Capitule_ Twintich Mudde Spelten / erflich / mate_ en_ pachs der stat va_ To_gren gheloeft te ene_ onderpande te zetten Den wilghe_ onderpant hi zede / dat hi hun deene_ wale en_ wetlich te voerdaghen ghesat en_ hun daer in na den lant~rechte gheguet hedde . waer bi meester Gheret vorsc_ van sijns deekens ende sijnre Capitule_ vorg_ weghen / en_ in name_ en_ orber hoers begheerde en_ versuchte va_ ons Scepene_ vorsc_ o_me sine_ penninc een cleernisse te hebben in wat goede die deeke_ en_ Capitule vorsc_ voer hoeren onderpant gheguet were_ / en_ woe die goede gheleghe_ sijn / en_ oft die goede Twintich Mud Spelten erflic mate_ en_ pachs vorsc_ wale weert were_ / en_ oft die goede doen ter tijt ons here_ her henrics vorsc_ vri los erfve ware_ / en_ hi in die goede alsoe gheguet en_ gheerft was / dat hi he_me denre mochte ontgueden en_ onterfven / en_ ene_ andere_ daer in guede_ ende erfve_ / na willich versuech wij ghilijs Scoutet vorsc_ mit willen ende openbaer gheheit ons here_ her Henrics vorsc_ maende_ die Scepene_ vorsc_ dat sij van + den vorsc_ poente_ den vorg_ meester Gherede in namen en_ behoef des dekens en_ der Capitule_ vorsc_ een cleernisse gheefven behaudelich hoers rechs / dat sij daer van sculdich were_ te hebben / Waer bi wij Scepenen vorsc_ vter banc trecden op eyn zide / en_ onder ons / en_ oec mit andere_ lude_ die doen ter tijt Scepene ware_ wale wetlich en_ rijpelich beriede_ Ende daer na weder in ons banc trecden / en_ noe~dat wij ter banc ghezeete_ / en_ va_ onsen Scoutette vorsc_ ons raets ghemaent ware_ / cleerde_ wij overmids johanne van liechtvelt die di woerde droech mit onsen gansen alinghe_ ghevolghenisse / dat te voerdaghen omtrent drie en_ twintich iaer oft baet / ons vorg_ here her Henric voer Scoutet en_ Scepene_ van werme quaem / en_ voer Twintich Mudde Spelten erflich die hi den Deeken en_ der Capituelen gheloeft hadde te onderpande te zette_ ghelijc dat vorsc_ is Soe guedde hi her wilhe_me van sintruden / en_ her johanne van Fleron Canoni_ghe onser vrouwe_ keercke van To_gre_ vorsc_ / in name_ en_ te behoef des Deeke_s en_ der Capituele_ vorsc_ / na der ghewoende_ onser banc vorsc_ mit alle_ sole_pniteit daer toe hoerende en~gheen poent va_ rechte achter ghelate_ behaudelich en yghelics goet rechs in Twee bonre bamps luttel min oft meer gheleghe_ te werme mit ene_ hoefde neven den pa_mis hoef / en_ mit de_ andere_ hoefde te vriheerne weerts / neve_ lambrechs hughe_ va_ werme Eusel . Ende mitter zide_ te To_gre_ wert neve_ dat ghemein broec gheheite_ Spelbroech Ende mit der ander zide_ neven den art die leet in Cruyslindervelt . Jte_ noch in drie bonre ackers lans luttel min oft meer gheleghe_ in ene_ langhe_ stucke dat compt mit ene_ eende strecke_ niet verre van + de_ vorscreve_ bampde / tusschen den wilghe_ en_ dat vorsc_ lant leet een stucke lans dat Lambrechs hughe_ vorsc_ is Ende jan jacobs heeft op die zide te hussilt weert ligghe_ neve_ dat vorsc_ lant . vijf en_ twintich roede_ lans die hi te leene heeft van + de_ here van hoerne en_ van Cortershem En_ op die zide te herne weerts op dat overste eende heeft sinter Claes altaer in + der keercke_ van To_gren gheleghe_ vijftien roede_ lans ligghe_ . En_ oec cleerde wij doen ten tide en_ noch huden des dags / clere_ / ki_ne_ / en_ haude_ / dat de Twee bonre bamps en_ die drie bo_re lants voer becleert doen ter tijt ons here_ her he_rics vorsc_ vri los p_per erfve ware_ / en_ dat hi oec in die goede alsoe gheguet en_ gheerft waes / dat hi he_me deenre altemale ontgoede_ / en_ de_ deeke_ en_ Capitule vorg_ daer in guedde_ en_ erfve_ mochte En_ dat die vorsc_ bampt en_ lant doen ter tijt en_ noch huden op dese_ dach wale weert sijn Twintich Mudde Spelte_ erflics pachs en_ mate_ vorsc_ En_ na dat cleernisse vorsc_ ghegheve_ was soe cande ope_baerlec oec ons here her he_ric vorsc_ dat alle_ zake_ en_ poente_ vorsc_ gheschiet were_ tussche_ heme en_ die here_ vorg_ ghelijc dat wij voere ghecleert hebbe_ En_ alle dese vorsc_ zake_ en_ poente_ soe lede en_ bevael Ghilijs ons Scoutet vorsc_ in onser hoede_ en_ ontheltenisse / En_ wij ons recht daer af ghehad hebbe_ . En_ wa_t wij peter horremort / wilhem Cleyne_ va_ hoesselt jan jacobs Godevart va_ werme / en_ jan swogher Scepene vorsc_ engheene p_pere noch ghemeyne_ zighele en hebbe_ Soe hebbe_ wij versocht en_ ghebede_ bidde_ en_ versuecke_ / wilheme va_ vriherne en_ janne va_ liechtvelt onse mede~gheselle_ / dat sij hoere p_pere zighele voer hun selve_ en_ voer ons in orco_den der waerheyt willen desen opene_ littere_ aenhanghen . En_ wij Ghilijs heze Scoutet voer ons selve_ / en_ wij wilhem va_ vriherne en_ jan van liechvelt Scepene_ vorsc_ voer ons selve_ / en_ voer ons mede~gheselle_ vorg_ o_me bede_ wille hors in orco_de en_ ghetughenisse alle_ de_ zake_ en_ poente_ vorsc_ hebbe_ wij onse p_pere zighele aen desen opene_ brief aen~ghehanghen / Ghegheve_ en_ gheschiet tot werme jn + den jare ons here_ gheboerte Dusent drie + hondert Sesse en_ neghe_tich des Vijf en_ twintichste dags van junio