Corpus Van Reenen-Mulder (CRM14): Oorkonde Q158a39601

Wijr Gheret Pousters van Tongren Meyer / meester Andries Reys / Wilhem vermechtilden van Heenis / Jan der Smeet van Autshove_ Godevart van Autshoven sijn sone / Stas van Heerne / Godevart Tielmans Cokarts zone / ende Florijs vermechtilden gheswore_ late hoefs des Deekens ende der Capitulen onser vrouwen keercken van Tongren / deenen sij hebben in + den dorpe van Heenis / groete in onsen here / mit kennisse der waerheyt . Cont sijn en ighelic die desen opene_ brief soelen sien oft hore_ lesen / dat voer ons als voer hof / daer men dat lant af heelt hier na becleert der vicedeeken ende die Capitule vorscreve_ sich verschene_ Ende zeeden / dat Art van heenis in sinen testame_te ende lesten wille / daer hi in gestoerfven were hun en_ hoerre keercken vorscreve_ besat hedde ende ghelate_ vier vaet rogg_ voer sijn iaerghetijde in die selve keercke iaerlijx te doende / ende der Fabriken der selver keercken een vaet rogghen / maten ende pachs van Tongren / iaerlix en_ erffelics hun te betalen te sinte Andries misse des Apostels / Ende die te hebben erffelech aen ende op Twelef roeden lants / luttel min oft meer / die wilen waren ioffrouwen Aleyden van heenis beghine_ van Tongren / des vorsc_ Arts zuster / die~wilghe men helt van + den vorsc_ hoefve / ende sijn gheleghen achter Hex hof mit eenen eende / neefven die Steeghe / ende mit eenre ziden neefven lant dat Godevarts Smeets wijfs is / Wellic setti_ghe en_ elmussen vorsc_ / die vorghenoemde here_ voer ons mit goeder leefve_der waerheit wale en_ wittelic proefden ende volcomelich / wellic proeffenisse ons Meyer vorscreve_ in onser hoede lede en_ bevael / Daer na versochten ende begheerden die vorg_ heren dat men hun dat vorsc_ goet na formen van testament / en_ na hoers hoefs recht goedde_ en_ erfden / Waer bi wij late vorscreve_ daer op ghemaent / ende na~dat wij ons wale beraden hadden eendrechtelic wijsden / dat men tierst Arts van Heenis vorsc_ gherechten gherfven dach van rechte doen solde / om_e te weten oft sij iet rechs totten vorsc_ lande hun vermeeten in eynegher wijs / ende daer na selden sij den vorg_ heren doen allen dat sij na den rechte sculdich weeren te doende . Doer noe dat des vorg_ Arts gherfven / dach van rechte voer ons verschenen ende ghedaen was / Soe quam Liebrecht Heynrix van Heenis des vorg_ Arts brueders zoen / ende batteerde ende calengeerde die goedinghe ende die zettinghe / ende zeede dat die vorsc_ Tweelef roeden lants Arde sijnen Oem vorsc_ niet toe en hoerden / noch mechtich en was die te besweeren in eynegher wijs / want joffrouwe Aleyt vorsc_ sijne wettich Moye hem_e die in hoeren testame_te ende leste wille besat hedde erfvelich te hebben / ende daer bi soe hoerden die hem_e toe / ende sijn proper erfve Ende dat sij sijn were_ / ende Arts vorsc_ niet / dat wolde hi wettelic ende wale proefven / ende begheerde dach van rechte sijn waeret en_ allen sijn goet recht bi te bringhen / der willich dach sijn proeffenisse te doende waes hem_e mit menisse ende vonnisse der late vorsc_ verleent / die heren vorsc_ antwerden ende zeeden / dat die vorsc_ Tweelef roeden lants des vorsc_ Arts woren en_ dat hi wale mechtich was die te late_ en_ te beswere_ . en_ dat sij den vorg_ Liebrechte van Heenis niet toe in hoerden in einegher wijs want ioffrouwe Aleyt vorsc_ eer sij oec testame_t maecde met hoere_ goeden moet vrien wille coeme_ were voer den hof vorsc_ / en_ hedde dat lant wittelich op~ghedraghen in des Meyers hant te orber / behoef / en_ name / Arts hoers broeders vorsc_ / en_ hedde daer op verteghe_ / en_ quijt ghescouden alle hoer recht dat sij daer in hadde te ewelike_ daghen . Ende Art vorg_ wart na ghewoente ende rechs des hoefs daer in gheg˚et / en_ gheerft voer sijn proper erfve / Waer bi die here_ zeden dat testame_t dat ioffr_ Aleyt vorsc_ mochte ghemaect hebbe_ dat dat testame_te en_ ordina_tie niet van rechte en weere noch vortganc hebbe_ en solde / want sij aen dat lant gheen recht en hedde doen sij starf / Ende vort zeden die selve here_ / dat / soe wie die vorg_ ioffrouwe mochte hebbe_ testame_t ghemaect / dat alsulke testament Liebrechte vorsc_ en~gheen stade doen en solde / want dat testame_t binne_ Tien iare_ niet gheprueft en were / ghelijc alst lant~recht in~hedde . Ende van desen poente_ begheerde_ die vorsc_ here_ van ons een cleernisse te hebbe_ om_e hoere_ penninch . Ende vort zeden sij oec dat / wat proeffenisse Liebrecht in~zette / dat hun en~gheen onstaede doen en zulde / Mer dat lieten sij gaen alsoe verre alst van rechte sculdich were te gane / wilghe zake_ aldus geschiet / wij late op dat vorsc_ cleernisse name_ ons beraet te neeste_ nachten . Ende ten nachten / na~dat wi ons wale en_ rijppeleech beraede_ hoede_ / en_ van onsen Meyer ghemaent ware_ / cleerde wij / overmits Johanne va_ Autshove_ onsen meden~gheselle vorsc_ / die die worde droech mit onsen gansen alinghen ghevolgenisse / dat te voerdaghen ioffr_ Aleyt vorscreve_ quaem voer onsen hof vorsc_ / en_ mit hoere_ moet vrien wille droech op die vorsc_ Tweelef roeden lants / in name_ en_ te behoef Arts van heenis hoers broeders vorsc_ / en_ daer op verteech en_ quijt scaut / hoerre noch hore_ gherfven niet rechs heerlecheits noch vermeets daer in te behauden en eynegher wijs / daer nae te richs wart der vorsc_ Art in dat vorsc_ lant / na ghewoente_ ons hoefs vorg_ gheguet en_ gheerft als voer sijn p_per los erfve . Ende daer noe tehants wart der selve Art op dat vorsc_ lant gheswoere_ laet ghemaect in onsen hof vorsc_ / ende oec laet starf daer van / en_ dat daer na een langhe wile der vorg_ Art mit Acht roede_ van + de_ vorsc_ Tweelef roede_ lans sich behalpe / en_ daer op zatte Goeden van Autshove_ drie vaet rogghen te onderpande . Ite_ oec cleer wij dat ons niet co_dich en is dat Liebrecht vorsc_ voer ons ioffr_ Aleyde_ sijnre Muyen vorsc_ testame_t oec proefde / willich cleernisse aldus ghegheve_ / die heren hoer recht becande_ / en_ begheerde_ g˚edinghe / ghelijc dat sij te voerdaghen ghedaen hedde_ / Liebrecht antwerde ende zede dat hi allen prueffenisse liet varen / dat hi in~ghesat hedde / te voertide_ / ende dat hi coen were ten heyleghe_ / dat die vorsc_ Tweelef roede_ lans sijn proper erfve were_ en_ heme toe~hoerden / ende den here_ vorsc_ niet / en_ dat hi hun noch der keercke_ daer meede gheen vier pe_ninghe goets ghels / noch die weerde daer van onrechs en dede / oft hi lie? den vicedeeke_ / en_ twee van + de_ autsten here_ te hoere_ eyde . dat sij selden swere_ / dat die vorsc_ Tweelef roede_ lans hun en_ hoere keercken toe~hoerden / ende hoerre erfve were_ / en_ dat sij hem_e daer mede gheene vier pen_inghe goets ghels noch die weerde daer van onrechs en deden / Op dit wilghe poent vorsc_ / die here_ vorghenoempt antwerde_ en_ zeden / want sij gheestelech lude were_ / dat sij niet sculdich en were_ te swere_ in + der maniere_ dat liebrecht vorsc_ hen dat loy ghedeilt hedden / Mer sij were_ bereit te sweere_ / dat sij ganslijc gheloefden / en_ op hoer beste hilen mit vele redene_ die sij zede_ / en_ na in~hauden ons cleernisse boeve_ bescreve_ / dat die zettinghe_ en_ elmussen boeven becleert hoerre keercke_ vorghe~noempt toe~hoerden / en_ liebrecht niet / ende dat sij Liebrechte daer mede en~gheen vier pe_ninghe goets ghels noch de weerde daer van onrechs en deden / ende des maecden sij sich partie en_ voer onse hoet / Liebrecht vorseet maecde en tieghen~partye Ende na~dat beyde die partien die hoeftvart verborcht hadden / en_ wij ten hoefde vare_ solden / soe quaem liebrecht / en_ renu_cieerde en_ verteech op die hoeftvart / en_ begheerde en_ versochte dat die here_ hoere_ eyt deden ghelijc dat sij deene_ gheboeden hedden / waer bi der vicedeeke_ mit Twee Canonicke_ van + de_ Autsten der vorsc_ keercke_ deene_ eyt deden / Soe~dat wij laete daer op ghemaent wijsde_ eendrechtichlec / dat die here_ hoers eyts wale en_ wittelic volcome_ were_ / ende vort wijsde wij Liebrecht ondervellich / ende goetden die vorg_ heren in name en_ te orber horre keercke_ vorsc_ / na vorme_ van testame_te in dat vorsc_ goet mit allen den rechte en_ sollempniteit dat der hof te rechte steit / en_ ghewoenlich is te gheschien / en~gheen poente van rechte achter~ghelate_ / behaudelich altoes en ighelijc sijn goet recht ontverlet aen die vorsc_ Tweelef roeden lans . Ende allen dese vorsc_ zake_ ende poente / en_ en ighelich van hun / soe lede en_ bevael Gheret onse Meyer vorsc_ in onser hoeden en_ ontheltenisse . Ende wij hebben ons recht daer af wale ghehat . Ende want wij Jan van Autshove_ nu ter tijt onsen zeghel bi ons niet en hebben / noch wij wilhem vermechtilden / Godevart van Autshove_ / Stas va_ herne ende fflorijs vermechtilden loete vorsc_ en~gheen p_pere noch ghemeyne_ zighel en hebbe_ / Soe hebbe wij ghebede_ en_ bidde_ Gheret onse Meyer / en_ meester Andries Reys / en_ Godevart Kokarts onse mede~ghesellen vorsc_ / dat sij voer hen selve_ / en_ voer ons in ghetughenisse der waerheit hoerre p_pere zeghele aen desen brief wille_ aenhanghen . Ende wij Gheret Meyer en_ meester Andries Reys ende Godevart Kokarts loete vorsc_ voer ons selve_ en_ voer onse gheselle vorg_ om_e bede wille hoers en_ versuech der here_ vorsc_ in orconde ende ghetughenisse der waerheit allen den zake_ en_ poente_ vorsc_ hebben wij onse p_pere zeghele desen littere_ aenghehanghen . Ghegheven ende gheschiet in + den jare ons here_ gheboerte Dusent Drie + hondert Sesse en_ Neghentich des Twee en_ Twintechste daechs van Sprockille .