Corpus Van Reenen-Mulder (CRM14): Oorkonde Q158a39701

Cont sijn allen luden die desen openen brief soelen zien oft horen lesen / dat voer ons Henricke Ruse Meyere / Robine van Authusselt / librechte Henrics van Heenis / Ghilijse Moferant Johanne Hercke / ende Arde koechs van Heenis / ghesworen late hoefs des gheluchs Sinte Hubrechs Capelle van Heenis / als voer hof daer men die drie ende een halfve groet roeden ackerlants / luttel min oft meer / die gheleghen sijn achter hof wilen Jans van hex / dien nu Henric Snellinx bezitte / ende stoeten mit ene_ horninghe aen Jans bampt van Autshoven des Smeets . Ende ghelden den voerghenoemde gheluchte iaerlix enen Auden groten Ceys / quaemen ende verschenen lijflech ende in p_pere_ p_sonen her Johan fleron ende meester Gheret van Heere Canoni_ghe onser vrouwen keercken van Tongren in + den kreesdom van lutken gheleghen sich partie makende_ ende in namen orber ende tot behoef derre kercken van Tongren vorsc_ . Ende zeden dat Art van Heenis in sijnen testame_te ende leste wille / daer hi inne ghestorfve_ weere der keercke_ van Tongren bezat ende ghelaten hedde vier vaet rogghen voer sijn iaerghetide in die selve keercke jaerlix te doende / Ende der fabrike_ der selver keercke_ een vaet rogghen / maeten en_ pachs van Tongren hun iaerlix en_ erfvelix te betalen tot Tongren op den Spiecker te sinte Andries misse des Apostels / Ende die te hebben erflich aen ende op die vorghenoemde drie en_ een halfve roede lans Ende op Tweelef roden lants luttel min oft meer / die voertijts waren Joffrouwen Aleyden van heenis beghinen van Tongren des vorseets Arts van Heenis zuster / die oech gheleghen sijn achter hex hof mit enen Jnde / neefven die Steeghe . Ende noch op meer anderen onderpant / willich zettinghe ende elmusen die vorg_ heren voer ons mit goeder levender waerheyt wale en_ wittelich ende volcomelich proefden / wellich pruefenisse ons meyer vorsc_ in onser hoeden lede ende bevael . / daer na versochten ende begheerden die vorg_ heren / dat men hun in name_ orber ende tot behoef horre keercken vorsc_ / in dat vorg_ lant / alsoe verre / als dat voer des gheluchs hof ruert ende daer af helt / na forme_ van testame_te / ende nae ons hoefs vorsc_ rechte ende ghewoente guedden ende erfden . waer bi wij late vorsc_ daer op ghemaent / ende na~dat wij ons wale beraden hadden / eendrechtelich wijsden / dat men tierst Voese den Scheerre / woene_de in die stat van Tongren dach van rechte doen solde / om_e te wete_ / oft hi heme iet rechs totten vorsc_ drie en_ ene halfve roede lans / vermeten in einegher wijs wolde Ende daer na solden wij den vorghenoemde_ heren en_ horre keercken doen / allen / dat wij na den lant~rechte sculdich weeren te doende / Des dede ons Meyer mit Twee late_ ons hoefs den vorg_ Voese dach van rechte voer onsen hof tieghen die here_ en_ hoer keercke vorsc_ / omme te weten oft hi iet rechs hem_e vermeeten wolde aen dat vorsc_ lant / oft die guedinghe batteeren . Daer na ten ghenachten soe verschene_ hun beyde die partien vorsc_ voer ons als voer hof / Ende na~dat die here_ van hoerre Capitulen ende keercke_ weghen na forme_ van testame_te / guedinghe versochten des vorsc_ lants / Soe batteerde ende calengeerde Voes vorg_ die goedinghe ende die zettinghen / alsoe verre als Art van Heenis die drie en_ een halfve roeden lants in sine_ testame_te besweert hedde / ende niet voerder / Ende zeede dat die drie en_ een halfve roede lants noyt Arts van Heenis waeren / noch mechtich en was die te beswere_ / mit testame_te / noch met eynegher ander maniere_ . Mer dat die vierde halfve roede sijns vaders ende sijnre Moeder ware_ / Ende na doet hoers ende sijns eynichs broeders op hem_e herstorfven ende ghevallen weeren / ende hem_e toe~hoerden en_ nieman anders . Ende dat hi noet~zake en dede / daer om_e hi sijns vaderlics erfve solde derfven / ende daer van ghepriveert sijn . Ende des begheerde der selve voes dach van rechte sijne waerheyt en_ allen sijn goet rechte bi te bringhen en_ te prueffen . Ende vort dat hi sijne pruefdaghe hebben zulde en_ sculdich were te hebben na den lantrechte . die vorg_ heren van horre keercken weghen antwerden ende zeden / dat die drie en_ een halfve roeden lants Arts van Heenis waren / ende daer wt ghestorfve_ weere / ende wale mechtich was die te zetten ende te besweren in sine_ testame_te ende leste wille / Ende dat die zettinghe die hi horre keercke_ ghelate_ hedde goet ende gherecht were . Ende vort zeeden sij al weert tzaecke / dat voes coste gheproefven dat dese drie en_ een halfve roede_ lants vorsc_ oec waren sijns vaders oft sijnre moeder / dat en solde hun / noch hoerre keercke_ vorsc_ / engheene onstade doen / noch letten noch hindere_ / noch voes stade doen / want sij wolde_ wale proefve_ dat Art van Heenis dese drie en_ een halfve roede lans als voer Twee vaet rogghen erfpachs vervolghet ende wt~ghemineert hedde / ende daer toe come_ en_ gheleyt were als tot sijne_ erfve / Ende die paislijch ende vredelich bezeten hedde Teen Jaer / vijftien iaer Twintich iaer ende meer / aen~sien Voese en_ onghecalengeert van hem_e . Ende dat voes ende Art beye binnen lans en_ in een stat en_ in een proffie altoes ghewoent hedden ende noit binnen den vorg_ tijde buten lans wonechtich ware_ . / Ende dat Art vorsc_ in det lant gheguet was / Ende daer van laet in onsen hof ghemaect was en_ laet starf En des begheerden sij oec dach van rechte allen hoer goet recht bi te bringhen ende te prueffene / Ende zeden dat sij oec hoerre proefdaghe hebben solden / ende des ghenuechde hun wale von_isse der late / Voes vorghenoempt antwerde en_ zeede / dat hi dese vierde + halfve roede lants arde vorsc_ noyt te onderpande en zette voer hof / noch voer here / noch denre af en ghinc / noch doer mede gheweercken en conde wa_t hij na doet moeders en_ vaders die noch huden des daechs niet opghehauden en hedde / En_ begheerde en_ versochte eernstelich aen onsen meyer dat men hem_e daer in goedde / ghelijc alsi hem_e na doet sijns vaders sijnre moeder en_ sijns eynichs broeders doet aen herstorfven were_ . Die vorg_ here_ van horre keercken weghen calengeerden ende batteerde die goedinghe mit reden die voergheseet is / ende zeeden dat men den vorseet voes daer in niet goeden en solde / hi en bewijsde dan meer rechs dan hi noch ter tijt bewijst hedde Ende voert becanden sij hoer recht / dat voes cande en_ ghelijt hadde / dat hi noit in dit vorsc_ lant gheguet en was noch opghehauden / wellich beke_nisse ons Meyer in onser hoeden lede en_ bevael Ende die here_ van horre keercken weghen ons recht daer af wale betaelden Ende vort versochten von_isse wie men in + der zaken zolde vort varen . waer bi wij late daer op ghemaent / en_ na~dat wij ons beraden hadden eendrechtelich wijsden / dat men beyde der partiden goet rechte en_ proeffenisse solde hoere_ . Ende daer na solden wij na ons bescheit en igheliker partide_ recht doen . Ende verschene_ voese dach allen sijn goet recht bi te bringhen Ende na~dat voes sijne gehtughen voer ons gheleit / en_ sijne proefdaghe / al ghehadt . en_ op allen andere_ waerheit en_ ghetughe verteeghen en_ gherem_itteert hadde Soe verschene wij den vorg_ heren dach hoer goet recht ende proeffenisse te doende Ten wilghe_ daghe die vorg_ here_ deden onse keercke~meestere daghen dat sij des gheluchs registere voer ons brechten / en_ dat lieten zien / die~wilghe meest_e voer ons ten daghe quamen / ende dat register vort brachte_ / des begheerden die here_ van horre keercke_ weghen om_e hoere_ pen_inc een cleernisse te hebben / oft wij dat register dat sij daer voer oghen brachten voer goet en_ gherecht hilen . waer bi wij daer op + ghemaent ware_ van onsen meyer En_ na~dat wij ons daer op wale beraden hadden cleerden en_ wijsde_ dat wij dat vorsc_ register voer goet en_ gherecht hilden / wellich cleernisse / in onser hoeden en_ ontheltenisse ons Meyer lede en_ beval / en_ ons recht wart ons daer af betaelt . Daer na soe zeede voes die daer en~tieghenwordich was / dat hi dat ghedinghe corte_ wolde / en_ allen ander prueffenisse laete_ vare_ Ende deylde den heren vorg_ dat loy in deser manieren . dat hi den vis~deecke_ en_ Twee van + den Autsten Canonicke_ van + der keercke_ van Tongren liete tot hoere_ eyde / dat sij sweere_ solde_ dat die vierde + halve roede lans vorsc_ die sij mijne_ mit noch meer ander goets dat hoer onderpant sijn vijf vaet rogghen erfpachs / die Art van Heenis vorsc_ in sijne_ testame_te hoerre keercke_ ghelate_ heeft hoer proper erfve sijn en_ hen toe~hoere_ en_ hem_e niet / en_ dat sij hem_e daer mede en~gheene vier pen_i_ghe goets ghels oft die weerde daer van onrechs en doen / oft hi were coene ten heyleghe_ dat die vierde + halve roede lans vorsc_ sijn p_per erfve weeren en_ hem_e alleene / en_ niet den deecke_ ende der Capitule_ / noch der keercke_ van Tongren vorsc_ toe en hoere_ Ende dat hi der Capitulen noch der selver keercken daer mede engheen vier pe_i_ghe goets ghels / noch die weerde daer van onrechs en dede . Hier op antwerden die here_ vorg_ en zeden dat die eyt die voes vorsc_ hun deilde niet van rechte en is / en_ dat hoer here_ der vis~Deecke_ en_ die Capitule na der maniere_ ende vormen dat hi hun dene_ eit ghelaten heeft niet sculdich en sijn van rechte te sweeren / want dat goet dat sij heyschende sijn horre keercke_ toehoert / ende sij gheestelich lude sijn . Mer aenghesien voes ken_isse dat hi voer ons kande dat hi noyt die vierde + halve roede vorsc_ ontfinc noch te hoefve daer van en quam / Ende aenghesien ons cleernisse / dat wij des gheluchs register voer goet en_ gherecht halden / en_ dat men Arde van Heenis in + den register vorsc_ vint staen ghescreve_ op dat vorsc_ lant / en_ voes den Scheerre noch sijn voervaren niet / Ende oec dat Art vorsc_ in o_se_ hof laet was ende laet starf / Ende dat men niet vinden en can dat Art vorsc_ oit ander goet hiel van onsen vorsc_ hoefve / dan dit vorseet lant dat voes calengeert En_ oec aenghesien dat Art vorsc_ dat lant menich iaer paislech vredelich en_ onghecalengeert van voese bezeeten heeft / en_ in hebbinghe was / en_ bezaet doen hi starf Soe were_ hoer vicedeecken / en_ Twee van hoere_ ousten mede~Canoni_ghe bereit te heyleghen te sweere_ / dat sij ganslich gheloefden en_ op hoer beste hilen overmids die zaken vorsc_ / dat die zettinghe ende elmusse boven becleert / die der vorsc_ art horre keercke_ ghelate_ heeft der selver keercke_ toe~hoert / ende voese niet / Ende dat hoer keercke vorseet voese vorsc_ daer mede engheen vier pen_i_ghe goets ghels noch die weerde daer van onrechs en doet / Ende des maecden die here_ vorsc_ van horre keercke_ weghe_ sich partie en_ voer onse hoet / voes maecde sich en tieghen~partie Ende binne_ den nachten dat vaes verborghen zulde die hoeftvart soe besiechde hi ende starf / des deden die vorsc_ here_ na doet voes / sijne_ wijfve dach doen tieghen hun Ende ten nachten soe quame_ die here_ en_ versochten gudinghe na formen van testame_te / ghelijc dat sij te voerdaghen ghedaen hoeden / en_ maecden sich partie / tieghen voes wijf . dat die eyt die voes hun ghedeilt hedde doen hi leefde / dat die eyt niet van rechte en weere Mer dat sij dene_ eyt doen wolden / en_ oec niet voerder sculdich en were_ te doende dan sij te voerdaghen dene_ voese gheboeden hedde . Ende des maecden sij hen van horre keercke_ weghen partie voer onse hoeft tieghen die goede vrouwe . Die~wilghe vrouwe hoer verantwerde en_ zede / dat sij ombewart van voerspreecker en_ van rade were op deene_ dach . Ende want die vierde + halve roede lans vorsc_ hoer man bezat hedde in sijne_ testame_te ende leste wille / hoere_ eyghen vrien wille mede te doende / wellich zettinghe sij voer ons als voer hof wale en_ wettelich proefde / en_ in onser hoeden overmits onsen Meyer gheleet wart Ende na inhauden des vorsc_ testaments hoer toe~hoerden / ende die zake_ hoere aen hoer erfve dronghen / en_ oec niet wale condich en were wie sij tot nu toe ghehandelt hedde gheweest / dat sij na den lantrechte sculdich were dach van rechte te hebbene hoer te beraden / en_ te verantwerden . Den~wilghen dach mit wille der here_ wij loete mit menisse hoere vonsden . Ten nachten soe quam die goede vrouwe vort / ende cande hoere van + der vorsc_ hoetvart ondervellich / en_ zede / dat sij hoere liet ghenueghen mit alsuke_ eyde als de here_ gheboede_ hedden / Ende doen die here_ deene_ eyt boeden en_ bereyt ware_ te doende / doen scaut die vrouwe deene_ eyt hun quijte altemale . Des becande_ die here_ hoer recht / en_ dedent in onser hoeden legghen / en_ versochte_ vort von_isse en_ goedinghe na allen aensproeke en_ antwerde . Des ware_ wij laete van onsen Meyer vorsc_ daer op ghemaent Ende na~dat wij ons wale beraden hadden Soe wijsde wij eendrechtelich die vrouwe ondervellich / en_ goeden die vorg_ here_ en name_ orber en_ tot behoef horre keercke_ van Tongren vorsc_ / na forme_ van testame_te in dat vorsc_ lant / mit allen den rechte en_ solle_pniteit dat ons hof te rechte steit en_ ghewoenlich is te ghescien / engheen poent van rechte achter~ghelate_ / behaudelich mallex recht aen die vorsc_ vierde + halfve roede lans Ende alle_ dese vorsc_ zake_ en_ poente_ / en_ en ighelich van hun soe lede en_ beval Henric ons Meyer vorseet in onzer hoeden en_ ontheltenisse . Ende die here_ hebben ons wale betaelt dor van ons recht . Ende want ons hof vorsc_ engheen ghemeynen / noch wij Henric Meyer . Robijn / Ghilijs / Johan en_ Art / laete vorsc_ engheen p_pere zeghele en_ hebben Soe hebben wij ghebeden en_ bidden here_ wilheme van Rudechove_ priestere Rectour der Capellen van heenis onsen persoen / dat hi voer ons Ende daer toe Librechte Henrix vorsc_ onsen meden~gheselle voer hem_e selve_ / en_ oec voer ons in ghetughenisse der waerheit hoerre p_pere zighel aen desen brief willen aenhanghen . Ende wij her wilhe_ van Rudechove_ priester Rectour der Cappellen van Heenis voer Meyer en_ loete vorsc_ en_ om_e beden wille hoers want sij mijne proffiane sijn / Ende ich liebrecht vorsc_ voer mich selver en_ voer Meyer en_ mijn medeloete vorsc_ om_e beden wille hoers / en_ versuech der here_ vorsc_ in orconde en_ ghetughenisse der waerheyt allen den zake_ en_ poente_ vorsc_ hebben onse p_pere zeghele desen littere_ aenghehanghen . Ghegheven en_ gheschiet in + den Jare ons here_ gheboerte Dusent drie + hondert ende Seven en_ neghentich / des ierste dags van Sprockille .