Corpus Van Reenen-Mulder (CRM14): Oorkonde Q158a39702

Cont sijn allen luden die desen brief soelen sien oft horen lesen / dat ich Amelijs van lexhi van Sintruden kinne en_ lide / dat ich alsulke erfgoet als katherinen mijnre huysvrouwen toe~hoert / ende mich Reyner wilen van bom_ershove_ hoer vader / den god ghenedich sijn / mit hoere in huwelic gaf dat wilen her Jans van + der As ende her wilhems van Ordinghen ghebrueders Ridders was / eersamen ende berfven here_ den deecken en_ der Capitulen onser vrouwen keercken van Tonghere_ coupende i_ name_ ende te behoef hoerre keercken in + der manieren hier na bescreve_ / mit willen en_ rade mijnre huysvrouwe_ vorsc_ en_ hoerre neesten vrienden / om_e~dat dit vorsc_ erfve mich ende mijnre huysvrouwe_ verre gheleghen is / vercocht hebbe sonder eynich argheliste doer in te suecken in + der maniere_ hier na volghende te weten / dat dit erfve vorseet / dat hier onder eens deels becleert steit eest beter oft ergher gheslaghen is voer vier + ende veertich Mudde Spelten erflich maten ende pachs van Tongren Ende ighelic Mud Spelte_ is vercocht Achtien bescheide_ hollans gulden van + den vierden slaghe / van + der~wilgher Som_en corns vorsc_ acht ende twintich Mudde Spelten daer van een mechtich here her Gheret here tot Heere Ridder / dat ghelt mich betaelt heeft / soele_ toehoere_ der ordinancie / die hi mit consent ende rade des Deeckens ende der Capitule_ vorsc_ ghemaect heeft / te weten / te eenre missen daghelics terichs na den Metten / ende voer sijn ende sijnre vriende iaerghetiden allen maende eens te doende in die vorsc_ keercke emmermeer ende ewelich Ende van + de_ andere_ Sestien Mudden die de famentere en_ executoers her Johans wilen van Anthei Scolasters der keercke_ van Tongren vorseet / mich wale ende wettelich voltaelt hebben / soelen die Canonicke een Mudde Spelten hebben voer des vorsc_ Scolasters iaerghetide iaerlix in + der selver keercke_ te doende . Ende die ander vijftien Mudde sal hebben der Elter denen der selve Scolaster in sinen testame_te ende leste wille die besat heeft . Ende want mich dat vorsc_ ghelt dat op Seven + hondert ende Twee + ende neghentich bescheiden hollans gulden quaem voltaelt is / Soe scilde ich den vorghenoemde_ deeke_ die Capitule ende hoer keercke daer van quijte altemale . Ende gheloefve hen oecke / daer van num_ermeer iet meer te heyschene Ende vort kinne ich dat ich dat meeste deel van deser vorseden Sum_en ghels mit rade mijnre huysvrouwe_ ende hoerre neeste vriende aen zeker erfve dat hoere en_ mich naerre en_ bat gheleghen is / beleet hebbe / dat ich vercreech tieghen Reynere mine_ swaegher mijnre huysvrouwe_ broeder Ende dat overdeel ghels dat mich daer boefve_ overt meyne ich te belegghe_ aen goet erfve / als ic dat veile vinden can / . vort hebbe ich gheloeft ende gheloefve in goeden trouwen voer mich ende mine gherfve_ ende nacomelinghe alle aensproecke die mijn huysvrouwe vorsc_ oft horre vriende gherfve_ ende nacomelinghe / den vorg_ heren oft horre keercke_ mit + den rechte namaels deden aen dat vorscreve_ erfve / dat ich en_ mine gherfve_ hen die af doen solen / ende daer van Scadeloes halden . Oec waest tusschen die heren vorsc_ ende mich wale ghevorwert verredent ende ondersproeken / worden die lande vorsc_ ende hier na eens deels becleert ergher oft beter vonden dant vorsc_ is / oft oec namaels meer oft min gulden / dan sij nu ter tijt ghelden / daer en sal ich noch mine gherfve_ aen wennen noch aen verliesen / allen argheliste wut ghescheiden en_ ghesloete_ Dit is die declaratie ende die Sum_en van + den vorsc_ erfve dat ich den here_ vorsc_ vercocht hebbe . Jn + den Jersten die heleft van Tien boenre Seventien groet ende een half cleyn roeden mit ene_ derdeel van eenre cleinre roede_ lans / gheleghen tot Frerenen_dael al~om_e / in Seventien stucken / onder wilghe stucken is een stucke bamps / haudende vijf groet ende acht clein roede_ Ende van dese_ goede vorsc_ sijn die Twee deel eyghen goet / ende dat ander deerdeel is Ceys~goet des Busscops van lucke . Jte_ die heleft van Sesse bonre Seven groet ende Tweelef clein roede_ lans tot nederhem in Teen stucken gheleghen / Van + de_~wilghe_ Twee bonre ende dat derdedeel van ene_ bonre is Ceys~goet . Jte_ die heleft van Twee bonre Dertien groet Teen en_ een halfve cleyn roeden lants tot Malle en_ tot Millen in vijf stucke_ gheleghen / ende sijn Eyghen goet / Jte_ die heleft van + de_ Cappellen~hoefve met sijnre toebehoerde_ tot nederhem gheleghen . Jte_ die heleft van Vijf Mudden erfspelten Tonghers die Ghijse dorpers van zekere_ onderpande sculdich is Ende van allen desen vorsc_ goede heeft Francke hansmekers ende sijn huysvrouwe dat wederdeel . Jte_ noch dat Sesdedeel van Vijftien Mudde ende Seefven vaet erfspelten die Tien p_sone sculdich sijn te talene / wellich erfve van stucke te stucke ende manne te manne bescreve_ steet in een register dat ich den here_ gheleefvert hebbe alst vorsc_ is ende beghint . Dit sijn die goede die toehoerende sijn Amelijs van Lexhi ende Joffrouwen katherinen sijne_ wettighen wijfve / ende gheit wyt Jte_ die Cappelle Twee Mudde Spelte_ Ende wint Art Ghilijs Jte_ noch dat Sesdedeel van Twee en_ Twintich Scillinghen Seven pen_inghe ende ene_ Hellinc goets ghels Ende van Vijf en_ tseventich Capune_ iaerliker rente_ / luttel min oft meer / die~wilghe Ceyse ende Capuyne sculdich sijn zeeckere p_sone in een ander register van ghelijcker littere_ des vorsc_ registers ghescreve_ / dat ich den here_ vorsc_ oec over~ghelevert hebbe . Jte_ noch die heleft van Twee vaet ontJoyns die men iaerlix sculdich is van zekere_ erfve te Gladen gheleghen . Jn ghetughenisse der waerheit allen der zaken ende der poente_ vorsc_ heb ich mine_ zieghel aen desen brief voer aenghehanghen Ende vort ghebeden en_ bidde . Johannes Ghersten Oem / en_ meester henrich Ghersten broeder mijnre huysvrouwe_ vorsc_ dat sij oec hoere zighele willen mede aenhanghen in ghetughenisse en_ om meerre zekerheit te doende den vorsc_ here_ en_ hoerre keercken / waer bi dat wij Johannes ende meester Henric vorsc_ om_e beden wille Amelijs vorsc_ Ende oec / want ons die zaken wale condich sijn dat die aldus gheschiet sijn alst vorsc_ is Ende oec want die vorsc_ goede / met willen en_ rade ons vercocht sijn Ende dat ghelt dat daer van quaem alsmeer al aen ander goede erfve alst vorsc_ is mit willen ons beleet is . Soe hebben wij onse zighele mit Amelijs zighel aen desen brief ghehanghen in ghetughenisse der waerheit / ende te meerdere vesti_ghe_ den vorsc_ here_ te doende Ghegheve_ in + de_ Jare ons here_ gheboerte . Dusent drie + hondert Seven ende neghentich des ander daechs van Octobrj .