Corpus Van Reenen-Mulder (CRM14): Oorkonde Q158a39703

Cont sijn allen luden die desen openen brief soelen zien oft hore_ lesen dat wij Gheret here tot Heere ridder kinnen ende liden want der deecken ende die Capitule onser vrouwen keercken van Tongren ons goetlich gheorloft en_ ghewilcort hebben dat wij een daechlix misse die men te~rix na den Mettene_ in hoer keercke op den hoeghen elter doen sal gheordineert ende ghefundeert hebben . Ende vort want sij oec ons gheloeft ende toegheseet hebben onse . onser voervaders ende allen onser vriende iaerghetide allen Maende mit vigilien ende zeel~Missen in hoer keercke vorsc_ te doende Soe hebben wij boven die Vijf + hondert ende vier bescheide_ hollans gulden van + den vierden slaghe daer mede sij acht ende twintich Mudde erfspelten tieghen Amelijs van Lexhi van Sintruden ghecocht hebben hun toe~gheseet ende laten verstaen dat wij totter selver Missen . vier . Mudde ende voer ons iaerghetide een Mud rogghen Tonghers erflich wyt~ghescheyden . Acht . pen_inghe goets ghels in onsen testame_te dat wij ghemaect hebbe_ op zekere lande die waren wilen wouters van betuwe ons neven den god ghenedich sijn ghelaeten hebben noe onse doet te heffene Die~wilghe zettinghe ghelijch sij in onse testamente bescreve_ steit wij hun ende hoerre keercken confirmeren ghestedighen en_ wilcoere_ te euweghen daghen sonder die iet te wederroepen . Ende om_e te meerdere zekerheyt den vorghenoemden here_ en_ hoerre keercken te doende soe gheloefve en_ gheefven wij in gherechter ghichten die vorsc_ vijf Mud rogghen te~richs na onse doet te hebben te behoef der Missen en_ onsen iaerghetide als vorsc_ is behaudelich altoes in hoerre macht allen den vorwerden ende ordinantie begrepen in die littere_ die sij ons mit hoere_ sighel besighelt ghegheefven hebben Jn ghetughenisse der waerheit hebben wij onsen zighel desen littere_ doen aenha_ghen . Ghegheefven in + de_ jare ons here_ gheboerten dusent drie + hondert ende Seven en_ neghentich des neghentiende daechs van Octobrj .