Corpus Van Reenen-Mulder (CRM14): Oorkonde Q162p39802

Cont sijn allen luden die desen openen brief solen sien oft horen lesen / dat voer ons johannes Bottart Meyere ende laete / Henriche van Rudechove_ / Arde Mobbe Henriche domine / johanne Momboers / Petere froyts ende Robeerde van Egghertinghen ghesworen late hoefs der kellenien des Busscops van lutke in + der selver stat van Tongren / als vor hof / daer men die goede hier onder becleert af helt / verschene_ sich lijflech ende in p_pere_ p_sonen eersame en_ bescheyde heren / her Roelof Deken onser vrouwen keercken van Tongren van sijnre keercken weghen / meester Gheret van Heere Canonich der selver keercken voer die Cappeloene der selver keercken / ende her Magghiel Nouts Persoen vande_ beghine_ van Tongren / voer sich selven ende sijne Cappelloene sich partie makende . Die vorghenoemde heren seden dat her Gheret here van Heere Ridder / dene_ God ghenedich sijn / in sine_ testame_te ende leste wille / daer hi inne ghestorfven is / ghegheven ende ghelate_ heeft der keercke_ van Tongren vorscreve_ tot eenre daghelicker missen / te~rix na den den Metten op den hoeghen altoer te doende vier mudde rogghen mate_ ende pachs van To_gren jtem der fabriken der selver keercken Twee vaet te hulpen te twee kerssen / die men setten sal alst tripel~feeste is aen die pileernen in den coer onder die beelden de Caritate et hu_ilitate / jtem der Mandaten der selver keercke_ . Twee vaet . jtem der Ebdomade der vorsc_ keercke_ Twee vaet . jte_ voer sijn iaerghetide in + der selver keercken van Tongren iaerlics te doende een Mudde onder die Canonicke ende die Cappeloene ghelijc te deilen / behaudelich des / dat me_ daer af iaerlich ende erfelich den Cloestenere / ende den bastionier der selver keercke_ van Tongren acht pe_ninghe goets ghels gheefve_ sal . jtem den Cappelloene_ der vorsc_ keercke_ een Mud . Ende hier af soelen sij den Twee Clockeren van onser vrouwen keercken vorg_ iaerlix gheefven acht pe_ninghe goets ghels . Ende dat overdeel van desen Mud rogghen vorsc_ soelen deilen onder hen de Canonicke en_ Cappelloene / der Plebaen sijn twee gesellen der keercke_ van Tongren vorsc_ / der Prioer van sinte jacobs gasthuys / die Rectoere van onser vrouwen Eltere in sinte johans ende van sinte agaten Eltere in sinter claes keercke van Tongren gheleghen / der Cappelloen van sinte Anthonijs / ende die Rectoere van den Achte Capellen / die der keercke_ van Tongren toe~hoeren / die Messe lesen soelen op den dach dat sijn iaerghetide velt te doende . jtem den persoene va_ + de_ beghine_ ende sijne Twee gesellen een Mud rogghen / maten ende pachs van Tongren vorsc_ onder hen drien ghelijc te deilen . Ende van dese_ Mudde rogghen soelen die Twee Custerssen / der Clocker / ende die Twee portenerssen iaerlix ende erflich hebben / vijftien pe_ninghe goets ghels onder hen vijfven ghelijc te deilen . Ende dese Seven Mudde ende Sesse vaet rogghen vorscreve_ bewijsde der vorg_ here van Heere erflich ende emmermeer te hebben aen ende op vijf stucke_ ackers lants hier onder becleert haldende luttel min oft meer dan vier boenre ende drie groet roeden / men onder + halfve cleine roede / gheldende den busscop van lutke tot Tongren op sinte stevens dach Seventien pe_ninghe ende enen hellinc goet ghels / Twee vaet Spelten / ende dat derdedeel van ene_ cop honichs / ghelijc dat hier na cleerliker ghescreve_ steit / Ende vort ons wale condich is dat dit lant te voerdaghen ioncher wouters van betuwen was / ende dat hi vercochte dat wilen janne bollincs van Tongren . Ende der vorg_ here van Heere als neeste gherfve bescudde den vorg_ johanne dat vorg_ lant af / ende quamer toe mitten lant~rechte ende mit menisse ende vo_nisse ons . Ende vort waes in + den selven testament na dat men ons cont dede / onder~sproeken / woe des here_ gherfven ende nacomelinghe van Heere noe den lant rechte sculdich sijn dat vorscreve_ lant vander Capitulen / vander Capelloene / ende des persoens van + den beghine_ vorg_ hoefven te halden / Soe woude der selve here van Heere / dat sijne gherfven en_ nacomelinghe / die dit lant hebben ende besitten soelen / engheen opco_nisse daer af en betalen hier namaels . Ende allen dese vorg_ zettinghen ende poente_ vorsc_ die vorg_ heren voer ons mit goeder levender waerheit wale wettelich ende volcomelich proefden / willich proeffenisse onse Meyer vorsc_ in onser laete hoeden lede en_ bevael . Daer na versochten die vorg_ heren / dat men hen in dat vorg_ lant hier onder becleert na formen van testament / ende na ons hoefs vorsc_ recht ende ghewoente guedde ende erfde / waer bi wij late vorsc_ daer op ghemaent / ende na~dat wij ons wale beraden hadden eendrechtichlec wijsden / dat men die here_ vorsc_ na forme_ van testamente gudden solde in dat vorsc_ lant / behaldelich alremalx recht / waer bi ich johannes Meyer vorsc_ gudde die vorg_ heren in namen orber ende tot behoef alle_ der ordinantien voerbecleert / na inhauden ende formen testaments des vorseets here_ van Heere in dat vorg_ lant mit allen den rechte ende sole_pniteit dat ons hof te rechte steit / ende ghewoenlich is te gheschien / engheen poent van rechte achter~ghelate_ / behaldelic mallix recht / ende gheboet oec den vorghenoemde_ here_ vrede / Ende allen dese vorsc_ zaken ende poente_ ende en ighelich van hen lede ende bevael johannes ons Meyer in onser hoeden ende ontheltenisse . Ende die here_ . hebben ons daer van wale betaelt ons recht . jn orkonde ende ghetughenisse der waerheit allen der zaken ende poente_ vorsc_ / hebben wij Meyer ende laete vorg_ onse p_pere zeghele desen litteren aenghehangen . Ghegheven ende gheschiet in + den jare ons heren gheboerte Dusent drie + hondert ende achte en_ neghentich des een ende twintechste daechs van nove_brj . Dit is die declaratie van den vorsc_ lande dat in drie arde gheleghen is . jn + den iersten . acht groet roeden gheleghen over die haghedocht neefven johannes bottarts lant gheheite_ die Moude / ende neefven der keercke_ lant van Tongren . Ende ghelden den busscop vorsc_ iaerlix Twee pe_ninghe goets ghels ende Twee coppe Spelten . jte_ dat ander stucke helt een boenre ende neghen cleyn . roeden gheleghen in enen anderen art bi wirixdale neefven den hoellendere ende neefven Sesteen roeden gheheiten die ke_pene . des voerseets here_ van Heere / ende neven lant wilen Tielmans Coeckarts / Ende mitter anderen ziden neven jans Maveis ende Cloesteneers kindere_ lande / die gheleghen sijn in + den anderen art / . Ende dit vorsc_ lant ghilt den busscob iaerlix vijf pe_ninghe ende ene_ hellinc jte_ dat deerde stucke helt achtien groete Seventien ende een halfve cleine roeden / gheleghen in + den derden art / met ene_ heutde op die gruenstrate die vander linden leit te Loen weert / neven lande sinte jacobs Gasthuys van Tongren / ende Henrics hoefnaghels / ende mitter ander ziden ende mitten andere_ heutde neven lant wilen joes cleynjans Scepens van Tongren / Ende dit lant vorsc_ ghilt den Busscob iaerlix vier pe_ninghe ende een vaet Spelten . Jte_ dat vierde stucke helt Twee en_ twintich groet roeden gheleghen in + de_ selven art / op die zide . van + der Catsiden te Pousters poel weerts mitten heutde ter Linde_ weert neven die vorsc_ katside / ende mit eenre ziden neven wilen jans van vlidermale ende katherine_ van wouteringhen lande / Ende mit der ander ziden neven wilen joes Cleinjans lant / Ende dit vorsc_ lant ghilt den Busscob . drie penninghe ende dat Deerdeel van enen cop honichs . jte_ dat vijfde stucke helt Dertien groet ende Tweelef cleine roeden lans gheleghen in + den selven art tieghen die tombe van Conixhem over bi~noe bi die katside / neve_ wilen Tielmans Cokarts ende jans Maveys lant / ende mitter ander ziden neven der vrouwen keyghels~lant van Tongren / Ende dit lant ghilt den Busscob Twee pe_ninghe ende Twee coppe Spelten iaerlix . Datu_ vt supra .