Corpus Van Reenen-Mulder (CRM14): Oorkonde Q165p39801

Cont siin allen den ghene_ die desen brief sullen zien en_ horen lesen / dat vore ons Johan van manshove_ h_en willems van steyvorde gielis swaue_ des here_ van here Ridd_e scoutete_ gesame_der hant / ghisebrecht anchoers / gielis arts / art Musen_e / Mielis scoeps / herman moes / willem h˚even_e / Ende h_man coelre die Jonghe scepene_ des dorps van horpale / siin come_ in p_pre_ p_sone / Conrart van grosen En_ eirmetruyt sine / wettighe werdin_e van + der eenre p_tien / Ende stas / stas beckers soen / Johan en_ cloes siin brued_e van + der and_e p_tien / welich conrart en_ eirmetruyt / kinden / en_ liden voer ons / dat sij hedden gegeve_ gesamender hant / te ene_ erf~pachte / dene_ voersc_ve_ gebrueders / hore hovs en_ hof / met sine_ toebehoerte_ / gelegen op die tomst_te te horpale tusschen erve en_ houz willem vleminx op die een side / en_ hueveners steghe op die ander side En_ dat brouk van horpale op die derde side / om_e . sesse . Mudde rogge_ mate_ en_ pacht van Loen jairlix en_ erflike den voersc_ve_ conrart en_ eirmetrude_ / en_ hore_ gerven te betalen / te sinte andries messe na slans gewoente als men erve_~pacht gewoenlic is te betalen / bove_ allen die last en_ com_er / doer die voersc_ve_ houz en_ hof mede belast en_ sculdich mogen siin / Ende om_e den voersc_ve_ drie . gebrueders te goeden en_ gnoich te doene van + den voersc_ve_ houze en_ hove met siinre toebehoerde_ / qua_ conrart die clerc is / met willem beyarde sinen mo_bor met von_isse hom verleent / Ende eirmetruyt siin wijf voersc_ve_ / want sij geduwareit was en dene_ voirsc_ve_ goede nam sij oich dene_ mo_bor den voersc_ve_ willem beyart die haer mette_ von_isse / gelevert was / en_ droege_ gesamender hant en_ eendrechtichlic oppe in onse hant der scoutete_ voersc_ve_ te orbere derre voersc_ve_ stas Johan en_ cloes gebrueders en_ vertege_ daer op / Ende doen alterichs te versueke derre voersc_ve_ drie gebrued_e / qua_ Johan voersc_ve_ en_ hielt oppe en_ ontfinc dat goet voersc_ve_ met wille co_sente en_ in p_sencien siinre twee . brueders voersc_ve_ / en_ waert van ons in dat houz en_ hof met siinre toebehoerte_ voersc_ve_ torber siins en_ siinre twee brued_e voersc_ve_ gegoet en_ geerft beheltelic alremallix recht / ov_mits die . sesse . Mudde rogge_ jairlix te betalen conrarde en_ eirmetrude_ en_ hon_en erve_ bove_ allen die last en_ com_mer den die voersc_ve_ houz en_ hof sculdich siin / Met alsulker vorwerden dat die voersc_ve_ stas / Johan / en_ cloes gebrue_e / dat voersc_ve_ houz en_ hof / van allen der last daer mede belast is / alsoe te tide verrichte_ soelen en_ betalen dat conrart en_ eirmetruyt nocht hon gerven egeen scade daer af liden in soelen aen hare . sesse . Mudde roggen jairlix te trecken en_ te hebbe_ paislic en_ vredelic En_ woir sij daer ov_ scade liden / die sullen die voersc_ve_ brueders op~richte_ / Ende ov_mits dese co_dicien / vorw_de_ / en_ pointe_ voersc_ve_ / w_de_ dese voersc_ve_ gebruede_s in dene_ houze en_ hove geboden ban en_ vrede na gewoente ons hoefs / beheltelic alremallix recht na dat onse hof te recht steet / welige pointe_ voersc_ve_ wij scoutete_ leden in hoeden der scepene_ voersc_ve_ / dit was geschiet en_ gedaen te horpale in die banc / En Orconde der wareit va_ allen desen vorw_den / saken en_ co_dicien / voersc_ve_ hebben wij Johan van manshove_ as scouteit des here_ voersc_ve_ vore mich selve / Johan aleyde_ / vore gilis swaue_ as scouteit des here_ voersc_ve_ om_e siinre beden wille / gilis arts scepen voersc_ve_ vore mich en_ vore allen Mijn mede~gesellen scepene_ des hoefs voersc_ve_ / om_e honre beden wille en_ versueks / en_ om_e~dat sij egeene_ p_pre_ nocht gemeyne_ ziegel en hebbe_ te deser tijt / onse p_pre ziegele aen desen brief doen hangen / jn + den jare va_ g_cien ons shere_ geboirte / dusent CCC . + acht en_ nege_tich . acht . dage in die loemaent . . .