Corpus Van Reenen-Mulder (CRM14): Oorkonde Q595r37503

Wir diric quant scoutet lambrecht van kestelt scepen te tricht . Gilis van borsen en_ arnout marsilis . leenman ons lieue_ h_en des Abts van sent Cornelis . t˚ghen als scoutet en_ leenman des Abts voers_ in + den houe van vdencouen / dat wir gesien gehoirt en_ ouerlesen hebben die brieue die hier onder gescreuen sijnt . van woirde te woirde ghans en_ gheue / onghecancelleirt / en_ mit honnen sieglen ongequest als sij eirstwarf gesiegelt waren besiegelt do die tenoir van woirde te woirde alsus is . Cont sij allen luden die desen tiegenwerdighen brief sien of horen lesen mit bekenne_nisse der woirheit die hir na gescreuen steit / dat voer ons comen sijn eirsaem en_ besceiden lude / dats te weten henric diderichs son croemffoets van audenhouen van eynre siden . en_ baets arnouts dochter van heppenart van + der ander siden . wilghe henric en_ baets voerg_ hebben sich verghadert en + witliken saken / war bi dat dese voerg_ arnout ghelouede desen voerg_ henric mit sijnre dochter eyn su_me ghelts / wilghe su_me ghelts dese voerg_ arnout / henric wail en_ wetlic betailt heeft . en_ henric voerg_ van + der seluer su_men ghelts / arnout voerg_ dar af quijt + schilt / Ende voirt so vertijt henric voerg_ en_ heet vertegen van alle_ den g˚ede dat arnout en_ sijn wijf en_ sijn kender besittende sijn / sonder eynich ersteruen dat henrich ouch sine_ wiue ouch sinen gerechten gheruen aen~vallen maich / alle arghelist en_ quode vonde vytgesceiden . En_ want ich henric egheynen p_pren siegel en hebbe soe bidde ich eirsamen en_ besceiden luden . joha_ne Cru_mel van audenhouen / ende Reyner bruych / en_ dirich van elen / dat sij honne siegle_ hangen aen desen tiegenwerdighen brief . En_ wir johan cru_mel . Reyner en_ diderich voerg_ om beden wille henrichs so heb wir onse siegle_ aen desen tiegenwerdighen brief gehangen / en get˚ichenis en_ vestinge der voerg_ vurwarden - Gegheuen jn + den joer ons h_en d˚ + men screif / d˚sent drie + hondert / + en_ drie + en + tsestich des . eyn + en + twintich_ dagh_ in die sporkil . En_ want wir scoutet en_ leenman voers_ collacie met den voers_ brieuen hebben doen maken aen dies copie voersc_ . en_ dat sij sich verdreeght alst voers_ is . so hebbe wir scoutet en_ lambrecht voersc_ onse siegle_ . En_ wir Gilis en_ arnout voersc_ want wir egheyn siegel en hebben / h_en reyners siegel van berghe ritters den wir des gebeden hebben in get˚ichenis derre woirheit aen desen brief doen hangen - Gegheuen jn + den joire ons h_en . dusent . + drie + hondert + . tseuentich en_ viue op sent thomas auont voer keirsmesse -