Corpus Van Reenen-Mulder (CRM14): Oorkonde Q595r37504

Jch heinric van heppenart Arnoults son walne van Coppelcouen / doen Cont allen luyden die desen brief solen sien of horen lesen / en_ kennen openbeirlijc / dat want ich wetlijc en_ wale vercoght hadde . wynande van hese roetsman te tricht in orber sijns en_ sijnre gheruen / veerteen bonre ackerlants luttel men of meer / en_ . twintich scillinge alder grote / noeghen pe_ninghe . en_ . twelue cap˚ne erfliker Renten / en_ ich den voers_ wynant / en_ sine gheruen gheloeft hadde in + den voersc_ g˚ede altemoil joer en_ daech te halden en_ alle recht aensproke aef te doen / gelijc die brieue in~hebben / die der scoltijt en_ leenman des eirwerdighen vaders des abts van sente Cornelis . in + den houe van vdencouen mit des voers_ scouteten siegel besiegelt inhebben / wilghe guede voersc_ jonffrouwe jutte docht_ walne wynants van houtheym alse neeste gherue en_ moegh / dat lant / scillinge / pe_ninge / en_ cap˚ne mit hoeren ghelde aef~geloist en_ ghequijt heet . gelijc den scoutet en_ leenman des voers_ abts in + den houe van vdecouen wail cont en_ openbair is . dar o_me so kenne ich henric voers_ en_ gheloue in gueden truwen en_ sonder eynghe arghelist . jonffr_ jutten voersc_ / in alle den erue en_ g˚ede voers_ joir en_ daech te halden / en_ alle recht aensproke af te doen / gelijc ich dat gheloift hadde wynande en_ sinen eruen voersc_ . En_ om te meirre sekerheit die saken voersc_ . so heb ich henrich alse p_ncipail mit mich ghebeden en_ te b˚rgesat en_ en ygelijc voer al / dats te weten eirsame lude Reynart royde myne_ neue . johan craegh van + der bruggen / en_ johan gesacht haen / die ich ouch geloift en_ gheloue in g˚eden truwen ouermits desen tiegenw_digen brief schadelois te halden / Mit deser v˚rwarden weirt dat sake dat ich versumelich woirde vonden namoils in + den saken voersc_ of in eynghen p˚nct derre saken gelijc alst voers_ is dat (onleesbaar) m˚et sijn / en_ ich en_ die burghen voersc_ o_me des ghebreecs wille gemaent woirden van + der voers_ jonffr_ j˚tten of hoirs sekeren boden wegen / so solde ich / en_ die voers_ borghen altemoil / en_ en + ygelijc van mich en_ van hon der eyn des anders niet verbeiden te tricht in eyne eirsame herberge die mich jonffr_ jutte voers_ of hoire seker bode bewijstde . ygelijc mit eynen perde in~varen / of eyne_ knecht voer en + ygeliken mit eyne_ perde in~senden do liggen te rechter leistingen op mynen cost / en_ no_mer van danne te scheiden mit nacht noch mit daghe / mar eyn pert voire en_ dat ander nae insenden alst vertert were derre voers_ jonffr_ j˚tten en_ w_e altemoil van + den ghebreke en_ scade den sij dar om liden m˚est volschiet / sonder eynge argelist dar in te keeren / en_ dis te orkonde so hebbe ich henric voers_ als p_ncipail voer mich / en_ voer joha_ne haen myne_ b˚rge voers_ die mich des gebeden heet / en_ dese voers_ saken willentlich geloift en_ bekant heet te voldoen mynen siegel an desen openen brief gehangen / En_ wir Reyner johans son des roden / johan gesacht craegh van + der bruggen en_ johan haen voers_ / kennen dat wir alle dese p˚ntten voers_ geloift hebben en_ gelouen die in gueden truwen te halden en_ te voldoen / so hebbe wir reynart en_ johan craegh voersc_ / onse siegle_ mit / siegel henrics voersc_ voer hoem en_ johan haen die des gebr˚ckt an desen brief mit ons_ wetentheit gehangen / Alle argelist nuwe quade vonde en_ ferpel geistlic en_ wereltlic in alle desen saken voers_ vytgesloten . Gegeuen jn + den jore ons h_en . d˚sent . + drie + hondert + . tseuentich en_ viue . des and_en dagh nae sent thomas dach voer keirsmesse . .