Corpus Van Reenen-Mulder (CRM14): Oorkonde Q595r37901

Wir Scouthet . Scepene_ . Meistere . Gheswoerne / Raet en_ Ghemeinte der vriheit van wuystherke alle samentliken vergadert mit der Stormclocken / mit g˚eden / gansen / vorsatden / ripe_ / raede / Doen cont allen luden / die desen oepene_ brief s˚elen sien of hoeren lesen / Dat onse lieue gheminde h_en mede~poert_e en_ b˚rgh_e / Deken en_ Capittel Onser vrouwen kirke van tricht ons / Omme onser stat wille te vesten en_ te stirken eyne sunderlinghe gratie Minne / gonst en_ vruynscap g˚etlike bewijst hebben en_ ghedaen Als mit drye Sillen m˚eren / die si ons o_me onse stat voirscr_ hebben doen maken . End om~dat die vorscr_ Minlike gratie en_ vruynscap onsen lieue_ h_en voirscr_ hoere_ nacomelinge_ / en_ onser vrouwen kirke voirscr_ / van ons of van onsen nacomelinge_ of ymant van onsen weghen / tot eyngherande scaede / herdernisse Swernisse / ghewaende of quade exempel ghekeert of ghetrect worde / Daer o_me gheloue_ wijr Scouthet / Scepene / Meistere / ghesworen / Raet en_ ghemeynte / alle sementlike der vriheit van wuystherke vorscr_ / voir ons / onse nacomelinghe / en_ stat voirscr_ jn g˚eden tr˚wen en_ in Eyd~stat / dat wir den Deken en_ Capittel onser vrouwen kirke voirscr_ en_ hoere_ nacoemelinghen / nu_mermee engheenrehande onghelt jmpositie / gonste / Of volluyst tot onser stat voirscr_ vestinghen of tot eynghen andere_ saken z˚elen heisschen / noch in gheenre wijs daer toe te dringhen / Alle weghen wt~ghesceiden onser kirken recht jn alle v˚rre p˚ynte_ / voeghen en_ manieren / gans vast / en_ stedich te bliue_ . En_ gheloue_ voirt den h_en voirscr_ / h˚eren tiendehof en_ h˚ere g˚et jn onsen eyghen ghelege_ / dat si hebben / ghelijc ons selfs g˚ede en_ jn~gheseten portere mit liue en_ mit g˚ede te bescerme_ en_ te bescudden / Nae alle onser macht Alle arghelist en_ quade nuwe v˚nde jn dissen voirscr_ saken wt~ghesceiden Jn kennisse der waerheit Soe heb wir in vestinghen en_ steitgheit alre puynte_ vorscr_ Scepene Meistre / ghesworen En_ ghemeynte voirscr_ Onsen ziegele aen desen brief doen hanghen / Gegheue_ jn + den jaere ons h_en als men screef Dusent Drie + hondert tseuentich en_ noeghen dis twelfste daegs van + der Maent junij