Corpus Van Reenen-Mulder (CRM14): Oorkonde Q599r36601

Allen luden die desen opene_ brief sien sullen of horen lesen / Wir adoem / capelloen te mersen / ind mombur des geluchts ua_ mersen vurs_ / inde Rutger deken van mersen / doen Cont dat vur ons comen sijn . henken gysen son ua_ sint Gerlach johan Caloeps / ua_ sint Gerlach jn johan ua_ berghe walums son ind hauen Sementlike vercocht Acht uait guyts pachts~rocgen erfliken den goetshuse ua_ sint gerlach en orber der petancien . alle jore te betalen tsint Andries messe des heylige_ apostels tsint Gerlach benne_ der moren of benne_ eynre milen vmb sint g_lach no dy juffr_ willen ua_ den cloyst_ vurs_ op henkens gysen sons / johans caloeps / ind johans ua_ berghe vurnoempt schade / cost ind anxt / jnd vmb eine sekerheit te doen den goetshuse ua_ sint Gerlacht ua_ den Acht uate_ rocge_ vurnoempt te talen ten vurspr_ tiden / so haue_ si honne tot eyne_ onderpand ghesat twe hoestaden / dy eine dy ghelege_ is te houtheym an dende bi des here_ benende dy men haldende is uan den ghelucht van mersen / dy ander dy ghelegen is emits ent dorp te houthem bi arnots Symons hoef / do ich Rutte deken vurs_ ein leen~here aue ben / jn alsulger uogen of si desen pacht vurnoempt niet en taelden tsint Andries messe vurs_ of vmbeua_ge_ toser @ vrouwe_ liechtmesse dat si dar ane broeclike were_ en einich deyl of te~mole / ten steden dy vurnoempt sijn / so sullen dy hoestaden vurs_ vereruen ane den goetshuse ua_ sint Gerlacht vurs_ / jnd dat dy juffr_ ua_ den goetshuse vurnoempt honne hant moge_ doen sloen ane dat onderpant vurs_ / dat doen keren ind wenden / halden ind besitten ghelike honne_ andere_ erue des neesten dachs no Onser vrouwe_ lichtmesse one wedersproke emans / beheltenis alwege_ der kirken / ua_ mersse_ ind des leen~heren rechts / willich recht dat goetshuys vurnoe_pt alwege_ des joers talen sal / Voert so haue_ vrancken kender op gheen~stroet / vier uait rogge_ ane dat vurspr_ onderpant / dy siin ouch tonderpand ghesat v˚r dy acht vait rogge_ vurs_ en alle der uoge_ als vurs_ is / of si brokelike w_en te talen as vurscr_ is / so vereruen dy vier uayt rogge_ mit den vurscr_ onderpande so wy vurscr_ an den goetshuse ua_ sint g_lach vurs_ . jn orkunde ind mere stedichgheyt dirre woerheyt / so haue ich Adoem capelloen te m_sen vurs_ her ouer geropen in ghebeden als loten des gheluchts va_ mersen willum willumps son ua_ mersen des vleyscheuwers / jnd ich Rutte deken leen~here der hoestat dy emits ghelege_ is te houtheym . haue hier ouer gheheyst / cloes vromine ua_ sint g_lach / heinken sine_ sone / jnd johanne den off_man ua_ berghe / als lote_ des hoefs / uan houthem / jnd uoert so haue ich Adoem v˚rs_ ghebeden eyne_ ersame_ hogen prelote herre_ johanne ua_ befoert proest te m_sen dat he sine_ Segel hier ane wille hange_ vmb eine mere stedichgeyt / ua_ ua_ des gheluchts wege_ vurs_ . jnd ich Rutg_ vurs_ haue ghebeden arnolde ua_ vleke miine_ swag_ / dat he sine_ segel vur mich ane desin brief wille hancge_ / mit des proests Segel vurs_ vmb eine gans stedichgeyt dirre woerheyt / jnd wir willum willums son van mersen / vurs_ . ind jutte des dekens wijf / Cloes vromine / heynken siin son / jnd johan der off_man vurs_ . loten des vurnoemden goets bekenne_ ind getugen dat dese vurspr_ vurwarde_ vur ons gheschiet siin / ind erkesin dit onder des proest Segel ua_ mersen vurs_ . ind Arnolts ua_ vleke vurnompt jnd wir johan proest uan mersen / ind Arnolt ua_ vleke vurs_ / bekenne_ dat dese vurwarde_ vurscr_ geschiet siin / so wi vurscr_ is / ind haue_ onse Segel ane desen brief doen hancge_ vmb eyne gants stedichgeyt dirre woerheyt / ind ouch vmb beden wille alle der partien vurscr_ . alle argelist vyt~ghescheyden . . / Gegeue_ en den jore_ ons here_ / Dusint + / dri + hondert ses in_ Sestich jore / des Andere_ dachs no sint Lucien dach .