Corpus Van Reenen-Mulder (CRM14): Oorkonde Q599r38501

Wir Johan van befort Proest der kirken van Mersen / Doen kont allen luden / End beke_ne_ openbeerlic mit desen brief / dat v˚r ons ende onse man / mit namen Joahn van hulsberch / ende Goeswiin van wierde / ende Gerarde deken va_ mersen / Comen is aes v˚r leenhere / ende man / Jonffrouwe Gertruyt van hulsberch mit h˚ren montb˚r jn der tijt dat si dat wale doen mochte Ende haet bekant dat si gegeuen haet / ende gieft / den Cloester van sinte gerlach / in gerechter gichten / gonsten / ende elmosen / alsoe sullich Erue / ende g˚et / mit ackerlande / bossche / ende weyden / aes si gegouden haet tiegen tonijs hoeren neue dat gelegen is te heke / ende geheyten is / die struuers~gracht / op willich Erue / ende g˚et / Jonffrouwe Gertruyt v˚rsc_ v˚r ons / ende onse man v˚rsc_ vertegen haet mit hoeren montb˚r / mit halme / end mit monde / Ende is des vyt~gegangen jn v˚rber / ende beh˚ef des Cloesters van sinte gerlachs v˚rsc_ / mit alsulger vurwarden / dat men die vrocht / ende not dar aef deylen en_ geuen sael half / op Jorgetide Jonffrouwen Gertruden v˚rsc_ / Ende dat ander half~scheyt op Jorgetiden Jonffrouwen Aleyden hore sust_ waes / der got genedich si / Joerlichs te deylen / aes onder die Jonffrouwen aes dat gewoenlich is / den genen die p_sentes siin mar die absentes siin / die en solen des niet hauen / noch deylen mit deser vrocht / si en weren dan vyt / om des Cloest_s vrber Jn getugenisse der worheyt dis briefs / so haef wir Johan van befort Proest / aes leenhere dis v˚rsc_ erfs / Ende Johan va_ hulsburch / ende Goeswiin va_ wierde / aes man / onse segel aen desen brief gehanghen / beheltenisse ons goitshuys recht / Ende want Jch Gerart deken v˚rsc_ / Geynen p_per segel en haef / so bidde Jch / ende Erkiese / onder Miins lieuen here_ des proest segel v˚rsc_ / dat wir Johan proest v˚rsc_ / gedoen hauen / om beden wille Gerarts v˚rsc_ / Alle argeliste hij + vyt gesceyde_ / Gegeuen Jn den Joere ons heren / dusent / + dri + hondert + / Ende vijf + / ende achtentich / op sinte Jorijs daech des heylge_ Ridders