Corpus Van Reenen-Mulder (CRM14): Oorkonde Q612r38901

. . Wir gherart strobant / Scouteit / gherart hacke / gherart van herborch / johan preut / heynric van riemst diederic leister / Peter van herborch en_ johan mathijs van Vdencoven Scepene_ des dorps en_ der bancke van Redekeim / doin Cont allen luyden mit desen tiegenwordichen brieve bekenende openberlich / en_ tugende as scout_ en_ scepen_n / dat v˚r ons en_ in onser tiegenwordicheit / Comen sijn en_ verscenen lijflich / Eersame besceden luyde hier nae gescreven / dat is te + weten / her heynrich van hercke proest / en_ . jonffr_ kather_ van honijs / priersse / jonffr_ jutte van den esgen / en_ jonffr_ gertruyt van buelsbecke cloester~jonffr_ tsint gerlach op eyne zijde / Ende jonffr_ jutte van houtheim wijnants dochter van houtheim wilne was den god genedich sij / ouch cloester~jonffr_ tsint gerlach / en_ gherart geheiten hoernsberch van sint gerlach gekoren laet en_ gesadt in der vortijt van der selver jonffr_ jutten wegen van houtheim voirs_ / van lande / Erve / ghelt / Chines en_ Capuene / als sij aef bescodde wyna_de van heese wilne was / en_ he gecocht hadde tiegen heynrich van heppe_nart ouch wilne was op die ander zijde / willich gherart voirs_ / op~gedragen hait mit sijnen goeden moetwillen / mit halme en_ mit monde alsoe als recht is en_ gewoende des hoefs van Redekeim jn hant jonffr_ jutten van houtheim voirs_ / alsullich lant / Erve / ghuet ghelt / Chines / Cap_ / en_ onderpant dat verbonden en_ gesadt is voer dat voirs_ gelt / gelijch die brieve inhauden die daer op gemacht en_ besiegelt sijn sonder eynge Argelist / dit aldus gedaen en_ geschiet / die jonffr_ van houtheim voirs_ / begerde ter stont tontvangen / dat voirs_ lant / Erve en_ ghuet / ghelt chines en_ cap_ soe wij voirs_ steyt en_ g˚edinge daer aef te hebben en_ te krigen also als recht en_ gewoenlich weer also dat hoer dat v˚rs_ lant / Erve en_ ghuet / ghelt chines Cap_ en_ onderpant gelijc dat voirs_ is verleent waert en_ daer in geghuet en_ gheerft beheiltenis mallich sijns rechts / also als dat gewoenlich is en_ recht eghein poent van recht noch van gewoenden achter~gelaten in desen saken / Vortmer soe is te + weten / dat die voirs_ jonffr_ jutte van houtheim ter stont en_ sonder eynich vertrech begherde sich te ontgueden en_ te onterffen / van den voirs_ lande / Erve en_ ghuet / ghelt / Chines / Cap_ en_ onderpant / en_ vort alle des rechts dat sij daer aen hedde sonder eynge Argelist tot orber en_ behuef des gemeynen Co_vents van sint gerlach voirs_ / also dat sij dat voirs_ lant / Erve en_ ghuet / ghelt Chines / cap_ en_ onderpant / en_ alle die Rechten die sij daer aen hedde of haven moicht in eyng_wijs opdr˚ch in hant des scouteit_ mit name_ voirs_ / tot orber en_ behuef des gemeynen c_vents van sint gerlach voirs_ / Dit aldus gedaen en_ volcomelich geschiet / die voirg_ Proest en_ Priersse en_ die ander jonffr_ mit namen voirs_ koren eyne_ man tot eyne_ laet also als recht en_ gewoenlich was / mit / namen gherart hornsberch van sint gerlach voirs_ / en_ boeden den voirg_ scout_ / Ov_mits ons scepene_ mit namen voirs_ / dat he dene_ voirs_ gherarde verleende dat voirs_ lant / Erve en_ ghuet / gelt chines / Cap_ en_ onderpant so wij voirs_ is / tot orber en_ behuef des gemeynen c_vents van sint gerlach voirs_ / as eyne_ gekoren lait en_ gesat van hoeren wegen / en_ anders nyet also dat der scouteit mit namen boven gescreven / denen voirgen˚an_ gherarde verleende dat voirs_ lant / Erve en_ ghuet ghelt / chines cap_ / en_ onderpant gelijch dat voirs_ is / en_ daer in ghuede en_ erfde als eyne_ gesatden en_ gekoren laet van des voirs_ gemeynen c_vents wegen van sint gerlach voirs_ en_ tot sijnen orber / behuef en_ profijt en_ anders nyemans sonder eynge Argelist Vort soe is te + weten / dat wir verstanden hebben en_ aen ons bracht is van der voirg_ jonffr_ jutten van houtheim voirs_ dat dis voirs_ lants is in eynen weghen veerteen bonre artacker lants luttel meer of meyn die~wilge nu + ter + tijt we_nen en_ te jaerpacht hebben johan mathijs en_ johan materenb_g Ende des onderpants / daer die tvintich scillinc auder groet op spreken is acht en_ tvintich bonre / Jtem des ghelts is tviuntich scillinc auder groet / gelijc voirs_ steyt Ende twelffe cap_ mit noegen peyni_ge chines En_ alle dit voirs_ lant is leen~ghuet ons heren des . . abts van sint Cornelijs en_ laet~ghuet ons jonch_en jonch_e willems van sombreff h_e tot Redekeim / ongedeilt / en_ is gelegen in der heirlicheit van Vdencoven en_ van Redekeim / gelijch dat wir verstanden hebben / alle argelist / ferpel en_ behendicheit / gheistlichs en_ werentlichs rechts vytgesceden in allen desen saken articulen en_ poenten voirs_ / Jn getugenis der warheit en_ omb beiden wille alle derre p_tien voirs_ / Soe hebbe_ wir Schouteit en_ scepenen voirs_ onse Siegele aen desen brief gehangen / Gegheven jn den jaer ons heren dusent dri + hond_t noegen en_ achtentich des sondachs nae sint lucien dach