Corpus Van Reenen-Mulder (CRM14): Oorkonde Q662r39701

Cont sijn allen luden die desen brief soelen sien oft hoeren lesen / dat voer ons Maes Maelplume Scoutich Petere Froyts wilheme Tiwoers der Steynbitselere van Nudorp . Petere Lansman / Lambrechte Honghers Reynarde Stassarts Ghilijse van Durby wonende te Nudorp ende wilheme Henrics Dam_anen soen van Nudorp Scepene des dorps van Freren verschenen lijflic ende in p_peren personen voersienghe ende berfve lude / Amelijs van Lexhi van Sintruden man van wapene_ . johannes Ghersten Oem ende meester Henric Ghersten broeder ioffrouwen katherine_ wettichs wijfs Amelijs vorsc_ op die een zide / ende her wouter van Malle Canonic onser vrouwe_ keercke_ van To_gren / als fementer ende executore / wilen her johans van Antey Scolasters en_ Canonic onser vrouwe_ keercke_ vorsc_ / ende meester Gheret van Heere Canonic der vorsc_ keercke_ van + der keercke_ vorsc_ en_ van her Gherets here tot Heere Ridders sijns heren ende vaders weghen / sich partide makende op die ander zide . Der vorseet Amelijs kande en_ openbaerlijc lijde / dat hi sonder argheliste in gherechte coupe alsulke erfgoet / als wilen Reyner van Bo_mershove_ den god ghenedich sijn met sijne_ ghelde tieghen wilen her wilheme van Ordinghen Riddere te voerdaghen vercreech / ende mit ioffrouwen katherinen sijnre wettigher dochter vorsc_ den jonghen Herma_ne van Herderen hoere_ ierste_ manne te huwelich gaf / en_ hi namaels aen hoere behouwet hedde / en_ mit hoere oec in huwelich ghegheefven were in gherechte coup sonder argheliste omme een zeeker Su_me ghels / vercocht hedde den Deecken en_ der Capitulen van Tongren coupende die Twee deerdeel van + de_ vorsc_ erfve in name ende behoef der ordinantien die sij den vorsc_ here van Heere ghewilcort hebben / te weten / tot ter fundatien behoef eenre daghelics missen / die men op den hoeghen autoer in der selver keercke_ te~richs na den Metten doen sal emmermeer en_ euwelic Ende voer des vorsc_ here her Gherets sijnre voervaders en_ allen sijnre vriende iaerghetide mit vigilien ende zeelmissen allen Maende eens te doende / ende dat ander derdeel vande_ vorsc_ erfve in namen ende tot behoef des Elters oft des gheens deene_ dat na inhauden testaments ende lesten wille des vorseets Scolasters van rechte sculdich is toe te horen . Vort kande des selve Amelijs vercoeper / dat der here van Heere vorsc_ heme die Twee + deel ende her wouter van malle vorsc_ van des Scolasters executien weghen een deerdeel van + der vorsc_ Su_men ghels wale ende wettelic voltaelt hedden / ende he_me daer van gnoech gheschiet were Ende scaut den Deecke_ en_ die Capitule vorg_ en_ allen man daer van altemale quijte Ende dat vorsc_ erfve / alsoe verre als dat voer ons hoeft / en_ men dat helt van ons mit allen sine_ rechte en_ toebehoerten droech der vorsc_ Amelijs op mit sinen goeden vrien moetwillen mit monde en_ mit halme in ons Scouttitten hant vorsc_ in name_ der keercke_ van Tongren vorg_ te weten die Twee deerdeel totter ordina_tien des heren van Heere / En_ dat ander deerdeel tot des Scolasters vorsc_ ordinantien ende leste wille alst vorsc_ is behoef ende orber Ende daer op verteech ende quijt~scaut en_ verhalmede hoeme noch sine_ gherfven oft nacomelinghe / niet rechs heerlecheits noch vermeets daer in te behauden en gheenre wijs / Waer bi wij Maes Scoutet met menisse ende vo_nisse meestere Gherede vorsc_ die guedinghe des vorseets erfs in onse hant ghedraeghen versuechte in name_ der keercke_ / ende te behoef der ordina_tien voerbecleert in dat vorsc_ erfve mit allen sijne_ toebehoerde_ / alsoe verre als men dat heelt van onser bancke / en_ doer ons hoeft / en_ in onse hant ghedraghen is guedden tot behoef en_ orber der vorsc_ ordinantien ghelijc dat in onse hant ghedraghen is mit banne ende mit vreden / ende mit allen den rechte solle_pniteit en_ ghewoenden dat onse bancke te rechte steit / ende die Scepene wijsden engheen poent van rechte achter~ghelaeten / behaudelich altoes en igelich sijn goet rechte / ende alsoe verre dat die Scepen_ vorg_ wijsden dat der vorsc_ keercke_ tot behoef der ordina_tien vorbecleert vanden vorsc_ erfve mit sine_ toe~behoerden volcomelich en_ altemale weere gnoech gheschiet Ende den vorg_ Amelijs niet meer rechs daer ane en becanden Ende alle_ dese vorsc_ zaken en_ poente_ en_ en ighelich van hen leden en_ bevoele_ inder hoeden ende ontheltenisse der Scepene vorsc_ Ende wij Scepene vorsc_ kinne_ et lijden dat wij daer bi ane en_ over gheweest hebben / doer allen die vorsc_ zake_ alsoe gheschieden en_ ghedaen worden alst vorsc_ is / Ende die altemale overmits onsen Scoutet vorsc_ in onser hoeden ghelacht en_ bevoelen sijn Ende wij hebben ons recht daer af Jn ghetughenisse der waerheit allen den zake_ en_ poente_ vorsc_ hebben wij Scoutet en_ Scepen_ onsen ghemeine_ zighel aen desen brief ghehanghen ter beeden en_ versuech des Deeckens en_ der Capitulen vorsc_ Ghegheve_ ende gheschiet in + den Jare ons here_ gheboerte dusent drie + hondert en_ Seven en_ neghentich des Tiende daechs van Octobrj